Abadabuka eZimbabwe abahlala kwele South Africa bathi ubathwalise amagabha avuzayo umkhankaso weOperation Dudula, oqhutshwa nguNhlanhla Lux Dlamini labanye bakhe. Abaqhuba umkhankaso lo bathi kumele bonke abaselizweni leli okungekho emthethweni bephume bephele kwele South Africa kungakafiki ekupheleni kwenyanga.
UMnu. Ngqabutho Mabhena, okhokhela inhlanganiso yeZimbabwe Community in South Africa, uthi abayindawo abadabuka eZimbabwe abahlala elizweni leli.
UMabhena uthi inhlanganiso yezansi yezwekazi leAfrica eyeSouthern African Development Community kumele ilungise udaba lolu.
UNkosazana Victress Mathuthu, okhokhela inhlanganiso yeZim Imbokodo, uthi umkhankaso lo uveza ukuba abokuza abasafunakali kwele South Africa.
UNkosazana Mathuthu uthi umkhankaso lo wedlula osokwehlela abantu bokuza abasebenza kwele South Africa.
Lokhu kusekelwa nguMnu. Bongani Dube, osebenza kwele South Africa, othi kumele inkokheli yakwele Zimbabwe ikhulumisane leye South Africa kulungiswe udaba lwabantu bokuza.
UNkosazana Nqobile Nyathi, ohlala kwele South Africa, uthi usekhathele ngokwenziwa ngabaqhuba umkhankaso weOperation Dudula.
UMnu. Teboho Sikhondo, isizalwane sakwele South Africa, uthi kumele abantu bokuza abahlala labasebenza kwele South Africa belandele imithetho.
Kulezizalwane zeZimbabwe ezinengi ezihlala kwele South Africa zingela maphepha aqondileyo. UMongameli Cyril Ramaphosa uthi akumelanga izizalwane zakwele South Africa zikhahlameze abantu bokuza.