Izisebenzi ngeSonto zinanze usuku lwazo olweWorkers Day zikhonona ngeholo eliphansi zisithi sokumele zihole idola leMelika hatshi eleZimbabwe eselingasathengi lutho ngenxa yokugugudeka.
Zethule lokhu kumbuthano wokunanza usuku lolu eZimbabwe Grounds eHarare lapho eziveze khona njalo ukuba zifuna ukukhetha zikhululekile umuntu ozathuthukisa umnotho welizwe ngomnyaka ozayo.
UMnu. Japhet Moyo, unobhala jikelele wenhlanganiso yeZimbabwe Congress of Trade Unions, uthi izisebenzi zithwele nzima eZimbabwe.
USikhwicamfundo Paul Mavhima, isiphathamandla sikahulumende obona ngenswelo zikazulu lezisebenzi, uthi kumele abantu bebambisane ukuze ilizwe lithuthuke.
Izisebenzi zithi zithwele nzima eZimbabwe, uMnu, Lovejoy Sibanda, okunhlanganiso yeProgressive Teachers’ Union of Zimbabwe, uthi usuku loku luqakathekiley loba bethwele nzima. USibanda uthi bafisa ukuhola imali ethenga abakufunayo.
Lokhu kusekelwe nguMnu. Effie Dlela Ncube, ohlala koBulawayo.
Izisebenzi eZimbabwe zithi idola leZimbabwe seliphele amandla ngakho-ke sokumele zihole eleMelika. Kodwa uhulumende uthi angeke akwenze lokhu ngoba ilizwe kumele libe lemali yalo.