UNkosikazi Nomusa Tshuma, umfelokazi wesizalwane seZimbabwe esabulawelwa kwele South Africa, uthi amapholisa athi kumele aphenduke enkambeni yabo eJohannesburg lapho okumele atshengiswe ababotshiweyo abafika phose amatshumi amathathu, abacatshangelwa ukuba babulala umkakhe, uElvis Nyathi.
UNyathi wabulawa ngesihluku egongodwa ngamatshe qede lapho bamtshisa ngepetulu waze waba ngumlotha elokitshini leDiepsloot kwele South Africa ngenyanga ephelileyo.
UMaTshuma uthi kasakwazi lokuthi enzeni yena esakhala umkakhe ngoba amapholisa aweSouth Africa athi kumele abuyele eyekhomba abantu ababotshiweyo acabangela ukuthi yibo ababulala umkakhe lanxa wabatshela ngaphambilini ukuthi kabazi.
"Bangifonele nje bathi ngiyafuneka lami ukuthi ngizobheka kulabo abantu ababanjiweyo ukuthi engxenye ngingathola ukuthi ngiqambe engimaziyo but mina ngendlela yokuthi labana abantu angizange ngibabone kahle ukuthi ngobani, so angiboni ukuthi ngizokhulumani.
“Ngizoqamba bani ngoba kwakusebusuku futhi angeke ngikhone ukuthi lo nguye ngoba lami babengitshaya. So, angizange ngibabheke kakhulu lebusweni ukuthi kungabe kungobani. Ngendlela engabona ngayo besenza umyeni wami angiboni ukuthi ngingaba lesifiso sokuthi ngifike eSouth Africa mina ngoba namanje ngisazwa ubuhlungu ngento eyayenzakalayo."
Uqhubeke ethi lokhu ehlulukelwe ngesahlakalo sokubulawelwa umkakhe. Ubonga lozulu ngokumcedisa kunye lohulumende weZimbabwe omnike amadola e Zimbabwe aphose afike isigidi - RTGS$960,000, okuzinkulungwane ezintathu zamadola aseMelika US$3,000.
"Kuyahamba khona uhulumende laye ungincedisile ngiyitholile imali hayi akukho okunye okunzima engingakukhuluma kodwa umzimba wona yiwo ongathi awukho right angiphilanga kahle. Ya, khona icouncelling iyafuneka, iyafuneka ngoba into leyana vele ayipheli kimi engayibonayo ayipheli, lokuthi nje ngincediswe lami ngiyakhe ngibelendawo yokuhlala labantwana bathole lokufunda."
UMaTshuma uhlala lezihlobo zomkakhe kunye labantwana abane elokitshini leNkulumane koBulawayo. Lapha abahlala khona baminyene ngakhoke isifiso sakhe ngesokwakha umuzi ahlale labantwabakhe ekhaya khepha ucela uzulu amncedise akhe umuzi wakhe.
"Istand sami sise Ntabazinduna. Ongabe elosizo ukuthi basincedise singajabula kakhulu, singajabula kakhulu lathi ukuthi sincediseke sithole okokuhlala lathi sicatshise amakhanda labantwana. Ngibonge lalabo abangincedisileyo ngibonge konke lemuli yako Nyathi, labomalume abancedisileyo. Bengicela ukuthi labantwana labo kumele beye esikolweni bedingelwe izindawo bebhadalelwe esikolo. Abala ma-uniform njalo bakhelwe indawo yokuhlala."
Unina omncane kaNyathi, uMaSibanda onguye ogcine uMaTshuma uthi umalukazana wakhe kaphilanga kahle, kudingeka ukuthi asizwe ngokuphangisa.
"Umalukazana uthi umzimba kawuzwa kuhle ubuhlungu. Asazi ukuthi lecounselling iyafuneka nje like ukuthi nxa kulosizo ukuthi engahamba kudokotela engahamba lakho kuyabe kulungile. Umuzi ufuna ukuwakha sibili, ufunukwakha umuzi ukuthi ehlale labantwana beyakhe sibili behlale kuhle labantwababo.”