amalinks wokungena

Breaking News

Idolobho leJohannesburg Lethula Umthetho Ovimba Abokuza Abafisa Ukuthengisa Impahla Emigwaqweni


Abantu abathengisa impahla edolobheni leJohannesburg, South Africa, May 6, 2020.

Idolobho leJohannesburg selethule umthetho ohlose ukuthi zonke indawo zokuthengisa ezitaladeni kuleli dolobho zithathwe yizizalwane zakwele South Africa.

Ngokutsho kwesiphathamandla sedolobho leJohannesburg esibona ngezomnotho kuleli dolobh,o uMnumnzana Nkululeko Mbundu, umthetho omutshalo uhlose ukuthi amabhizimusi okuthengisa ezitaladeni ahleleke, kungaminyani njalo kulandelwe imithetho yedolobho.

Uthi okwakhathesi kulamapermit okuthengisa emigwaqweni edlula inkulungwane ezilitshumi lane (14,000). Kodwake uthi inhloso yedolobho leli yikuphungula amapermiti la abe zinkulungwane eziyisitshiyagalombili kuphela (8,100.)

“Sizaqinisekisa ukuthi zonke indawozokuthengisela zithathwa yizizalwane zakwele South Africa.”

UMbundu uvumile ukuthi akukho emthethweni ukwalisa abalemvumo yokuzodinga ukuphephela kwele South Africa ukuthi bathengise ezitaladeni ngesikhathi izicelo zabo zisahlolisiswa. Uthi kukhona okufuze kulungiswe mayelana labadinga ukuphephela abaselizweni.

Leli dolobho lithi amapermit okuthengisa ezitaladeni azaphiwa ngokusebenzisana kogatsha lwendaba zasekhaya, olwezemithelo, olwezisebenzi kanye lamapholisa. Lokhu kutsho ukuthi bonke abalamapermit asephelelwe yisikhathi lalabo abangelancwadi zokuba kwele South Africa bazavalelwa ngaphandle kwaloluhlelo.

Eminyakeni elitshumi edluleyo kulezinkulungwane zezizalwane zeZimbabwe ezibakelele kweleSouth Africa ukuyadinga imisebenzi.

Kodwake njengoba isilinganiso sabangasebenziyo kwele South Africa ekhulwini sebesedlula amatshumi amathathu lanhlanu (35%) inengi labantu bokuza bazithole sebethengisa imibhida, izithelo lamatamatisi emigwaqweni.

Isikhulumeli senhlanganiso yeZimbabwe Community in South Africa, uMnumnzana Bongani Mkhwananzi, uthi baqaphe ngeso lokhozi ukubona ukuthi idolobho leJohannesburg lizawusebenzisa njani lumthetho.

“Istand ukuze usithole esokuthengisela kumele ube leSouth African ID. Ama South Africans lawa asuke aziqatshise out to ama migrants kwezinye indawo. If the South African is fine with renting their stall out and the migrant is happy to rent it and both of them are gaining out of this prospect, what is wrong with this?”

Selokhu kuqale lonyaka kuleqembu lezizalwane zakweleSouth Africa elizibiza Operation Dudula eselihambe indawo ezinengi elizweni lixotsha abakwamanye amazwe abathengisa emisikeni lisithi abasuke kulezi indawo kungene izizalwane zakwele South Africa.

Facebook Forum

XS
SM
MD
LG