amalinks wokungena

Breaking News

EleRussia Selibhomba Injanji Lemigwaqo Lisenzela Ukuvimba Ukuthwalwa Kwezikhali Ezinikwe eleUkraine Ngamanye Amazwe


Libhomba ngamandla eleRussia kwele Ukraine.

EleRussia liqhubelela phambili libhomba ngamandla endaweni ezinengi kwele Ukraine, ikakhulu izakhiwo elicabangela ukuba zincedisa ekuthwalweni kwezikhali ezinikwa ilizwe leli ngamazwe entshonalanga lamanye.

Kusenzakala konke lokhu, inhlanganiso ezitshiyeneyo zihlolisisa ukubulawa mahlayana kwabantu kwele Ukraine libutho lakwele Russia.

Inkampani yezindaba eyeAssociated Press ibika ukuba eleRussia lihlasele izakhiwo ezinjemigwaqo, injanji zezitimela lezinye emadolobheni abalisa iDnipro leOdessa isenzela ukuvimba ukuthwalwa kwezikhali ezinikwa eleUkraine ngamazwe atshiyeneyo.

Lihlasela ngamandla njalo eleRussia edolobheni leMariupol okulamasotsha labantu bakuleyondawo abasemigodini yokuzivikela kufekithali yokulungisa insimbi.

Kulenhlanganiso ezinengi ezihlolisisa ukubulawa kwabantu mahlayana emadolobheni anjenge Bucha, Karkhiv lamanye.

Kulabaye abantu eZimbabwe abathi kuqondile ukuhlolisisa ukubulawa kwabantu ngele Russia ngoba kwake kwenzakala lokhu eMatabeleland leNkabazwe ngesikhathi sombhuqazwe weGukurahundi.

UMfundisi Useni Sibanda, okunhlanganiso yeZimbabwe Christian Alliance, uthi kwephula inhliziyo okwenzakala kwele Ukraine.

UMfundisi Raymond Mosi, okubabandla leBaptist Church, uthi okwenzakala kwele Ukraine kumkhumbuza umbhuqazwe weGukurahundi.

Uyakhala loMnu. Mbuso Fuzwayo, okunhlanganiso yeIbhetshu Likazulu, othi kuyamangalisa ukuba kwele Zimbabwe lokhu kungaziwa ngokusemthethweni ngombhuqazwe weGukurahundi.

Abahlolisisa okwenzakala kwele Ukraine bathi balakho ukuphanyeka udaba lombhuqazwe owenziwa ngele Russia emthethwandaba weInternational Criminal Court loba eleRussia lingekho kunhlaganiso le.

Facebook Forum

XS
SM
MD
LG