Abantu abanengi koBulawayo bathi sebephilia nzima ngenxa yokuwa kwesisindo sedola leZimbabwe lokuswelakala kwemisebenzi.
Bathwele nzima abathenga bethengisa impahla, abatshayela imitshova labantu asebekhulile abehluleka ukuselela imuli zabo.
Imuli ezenengi zibhekane lodubo lobuyanga obesabekayo, inengi selisidla kanye ngelanga njalo imali yokuthenga ingekho.
UMnu Mehluli Sibanda ngomunye wabatshona bebhodabhoda enzikini yedolobho lakoBulawayo edinga okuyimisebenzinyanyana kwalelo langa.
"Ngihlala eCowdraypark ngigezisa izimota etown. Kulamalanga impilo inzima imali ayibambeki loba ibond lona alitholakali, U.S. worse amarate akhona asitshayelela phansi yonkinto iyaphela asisakwazi ukuthi siyenzeni imisebenzi ayitholakali lerate lakhona asisakwazi ukuthi yi300, yi350 abanye bathi 400 iqiniso asisalazi lebank layo ayikhulumi into eyiyo estraight."
Ugogo oleminyaka engamatshumi ayithupha lasikhombisa, uShiella Dube, uthi indlala bhe sezethengisa itiye ukuthi aphile ngoba kaholi -isocial welfare.
"Lapha kuya ngabantu bakhona. Babuya bebabhale ezindlini. Ingxenye lawe bakubhale ubone lowana sekutshela ukuthi mina sengilalokhu bekweqile. Especially, njengathi esizenzelayo vele abakukhangeli. Abantu ngingabacebisa ukuthi kasizenzelenini i government yasitshela ukuthi kumele uvuke uzenzele."
Inengi selihamba ngenyawo lisuka edolobheni lapho eliphanda khona lisiya emalokitshini ngoba imali ingekho kumbe sokudula okwamagama ukubhadalela indleko yemitshova esifuna ukuhlawulwa ngedola leMelika. Omunye walaba bantu kunguMnu Thabani Sipepa ocela idolar lokugada.
"Ngizama ukugada umtshova ngiya endlini ngibuyele ngenzela ukuthi ngiphenduke kusasa ngingatshintsha idollar leyana ngenzele ukuthi engxenye ngifika ngale endlini ngithenga something imbida nje. Ah siyadubeka kakhulu ,lamanje lezulu alinanga ,impuphu ikhwelile manje sikhuluma nge almost $6 ngiyathatha ngaphi i$6 ngicele idollar kwabanye ,things are tight namhla siyalala ngombida, umbida kuphela lempuphu umgayiwa."
Kodwa inengi lithi ukukhala akusizi ngoba akulamuntu ozalisiza loba ongalupha uncedo, uNkosazana Edith Moyo, wondla njalo ufundisa abantwabakhe abathathu ngokuhamba othengisa izithelo lembhida. Uthi akunkwali yaphandela enye.
"Siphandle lapha kuyabe kungani uyi begginer. Kungenxa yokuthi umumo we into uyabe ufuna ukuthi uqale upushe usebenze ukuze lawe ukwanise ukuthi kwelinye ilanga who knows you might get a place and rent a shop. Lokhe saba lonana singena etown ngo10 siwode siqalise ukubhodabhoda from 1pm sitshayise ngo5pm. Kuthwa khala uphethe ungaphongu hamba ukhala ucela ebantwini. At least go around with something uNkulunkulu engabona intoboyenzayo uzayi phakamisa."
Umumo wezomnotho lokhu usiba mubi ngamandla kwele Zimbabwe, ukudla kuyadula, imali ayikho, intengo yezinto iqansa nsukuzonke imuli ezinengi zilala ngendlala azisakwazi lokuthi ziyaphila kanjani lonyaka.