Umkhokheli webandla eliphikisayo eleCitizens Coalition for Change uMnu. Nelson Chamisa uthi ukunqoba kwebandla lakhe kukhetho lwama by elections olwedluleyo kukhomba ukuthi abantu sebediniwe ngebandla elibusayo eleZANU PF kungakho uzayibhuqa kukhetho lomnyaka ozayo. UMnu. Chamisa ukhulume la amazwi eGwanda namuhla emhlanganweni wokuthakazelela ukunqoba kowayenguMayor weGwanda uMnu Jastone Mazhale kukhetho olwedluleyo.
Ekhuluma esenkundleni yePhelandaba lamhlanje emini uMnu. Chamisa uthe lanxa ibandla lakhe lisanda ukubunjwa indlela eliqhube ngayo kukhetho iyathembisa ukuthi iyeza inkululeko kweleZimbabwe ngomnyaka ozayo.
Wethese uhulumende umlandu wokubhidliza umnotho wakuleli esithi ibandla lakhe lingangena embusweni lizaqeda indubo ezibhekane lozulu.
UKhansila kaWard 7, uMnu Jastone Mazhale uthe uzaqhubekela phambili eyisithunywa sezakhamizi zeGwanda.
UMnu. Welshman Ncube ongumsekeli kamkhokheli we weCCC uthi ibandla leZANU PF lizame ukubhhidliza ibandla labo kodwa lehluleka.
UNkosikazi Thokozani Khuphe owahlamukela uMnu. Chamisa ngomunye obekhona emhlanganweni weGwanda. Uthe kakho ongcono ongaba ngumongameli welizwe ngaphandle kukaMnu. Chamisa.
UMnu. Godfrey Masuku ongumfowabo weqhawe lesizwe umuyi uMnu. Lookout Masuku, uthi ubekubandla leZANU PF kodwa selifulathele ngoba kungekho elikwenzayo.
UMnu. Chamisa ukhuthaze uzulu ukuthi ayebhalisela ukuvota aphinde ayevota ngobunengi mhla welanga ukuze ibandla leZANU PF lingatholi amathuba okuqilibezela kukhetho.
Ibandla leZANU PF lona lihlezi lisithi lilenhlelo zokuthuthukisa umnotho welizwe. Ekhuluma emhlanganweni wabatsha bebandla leZANU PF osanda ukuqhutshwa eHarare, umkhokheli walo uMnu. Emmerson Mnangagwa uthe usola abasebenza lezitha zeZimbabwe athi bakhuphule intengo yempahla elizweni.
