Udlela evalweni umqeqetshi weqembu lomdlalo wenguqu eleHighlanders uMandla Mpofu phambilini komdlalo wabo leqembu leDynamos ngeSonto.
Iqembu le Highlanders lizadibana leleDynamos ngeSonto enkundleni ye Barbourfields kuleminyaka embalwa iqembu leDeMbare lacina ukunqoba ele Bosso kumidlalo yeligi kodwa uMpofu uthi abangeke bathembele kuleyo mbali.
“Umdlalo lowu kwesinye isikhathi awufuni uwukhangele ngembali. Ngoba okuzakwenzakala ngeSonto uyabe ungakwazi. Lalo iqembu leDynamos liphakathi kwamalungiselelo njalo ungakhangela lapho elihlezi khona, lihlezi phezu kwengalane ngoba lisenelisa ukudlala ibhola njalo liyenelisile ukuthatha imiklomelo lidlala lingekhaya lalapho lingekho ngekhaya.
Ngiyakwazi njalo ukuthi babuya beleqhubu elikhulu kakhulu ngoba sibanqobile kunkezo yeIndependence. Yikho ke lowu ngumdlalo omkhulu okuzamele lathi njengeqembu silungiselele okuzwayo ukuze sithole yonke imiklomelo esiyifunayo.”
Ngempelaviki eyedluleyo kulabalandeli beqembu leHighlanders abatshengisele besithi umqeqetshi uMpofu esuswe esikhundleni kodwa umgadli weqembu leBosso, uLynoth Chikuhwa, uthi abalandeli kumele babuye ukuzokhuthaza iqembu ukuba linqobe. “Engikukhuthaza abalandeli yikuthi babuye bezobukela ibhola njengenjayelo. Akusikho ukuthi babuye belanda ukuzothethisa. Ukubuya kwabo yikho okuzakwenza ukuba sithole imiklomelo emithathu esiyifunayo ngeSonto.”
Imvimbi yeqembu leHighlanders, uAndrew Mbeba, laye ugcizelele ukuba bazimisele njengabadlali ukunqoba ngeSonto.
“Umdlalo lowu ngumdlalo omkhulu kakhulu futhi onzima. Thina kodwa ngendlela esizilolonga ngayo sizimisele ukudlala sinqobe. Abantu bengabe besisola besithi abafana beHighlanders banjani njani kodwa thina sizimisele ukudlala sinqobe emdlalweni wangeSonto.”
Amaqembu lawa ayehlukaniswa yimiklomelo elitshumi lane njengoba eleDynamos lilemiklomelo engamatshumi amathathu kuthi eleHighlanders lona lilemiklomelo elitshumi lesithupha.
Eminye imidlalo eyeviki letshumi lanhlanu kusigaba seCastle Lager Premier Soccer League izadlalwa ngokulandelayo.
NgoMgqibelo iqembu leNgezi Platinum Stars lizemukela eleTenax ngase Baobab, iqembu leHerentals lizadibana lele Bulawayo Chiefs ngase National Sports Stadium, iqembu leBulawayo City lizadlala lele ZPC Kariba ngase Barbourfields, kuthi iqembu leWhawha lizangqikilana lele Harare City ngase Ascot.
NgeSonto iqembu leCaps United lizemukela eleChicken Inn ngase National Sports Stadium, iqembu leManica Diamonds lizadlala lele Black Rhinos ngase Sakubva kuthi eleTriangle lizadibana lele Cranborne Bullets ngase Gibbo.