amalinks wokungena

Breaking News

Amasotsha Elizwe leUkraine Edlula 1,700 Azinekela Kubutho leRussia eMariupol


Ukrainian soldiers ride in a military vehicle in Mariupol, Ukraine, Feb. 24, 2022.

EleRussia lithi kulamasotsha akwele Ukraine edlula inkulungwane lengxenye – 1,730 asezinikele kubutho lelizwe leli edolobheni leMariupol.

Amasotsha la ayesilwa ekunkampani yokwemba insimbi eyeAzovstal. Abezindaba abeAssociated Press babika ukuba amasotsha la asehanjiswe endaweni lapho eleRussia eselehlule khona ibutho lakwele Ukraine, ikakhulu esabelweni seDonbas.

Kubikwa ukuba eleRussia lithi lilakho ukuthonisa amasotsha la amacala okuthi bahlasela abantu makhaza kwezinye indawo ezigoqela iMariupol.

Uhulumende kaMongameli Volodymyr Zelenskyy uthi lokhu ngamanga aluhlaza tshoko ngoba eleRussia yilo elihlasela abantu abangelamibhobho endaweni ezitshiyeneyo.

Kubikwa njalo ukuba inhlanganiso yeRed Cross isivule ugwalo lapho eloba khona amagama amasotsha wonke azinikele kubutho lakwele Russia.

Ngesikhathi esifanayo, idale leCongress selikhethe uNkosikazi Bridget Brink ukuba ngumeli wakwele Melika kwele Ukraine. EleMelika lavala isigodlo salo kwele Ukraine kulandela ukuhlaselwa kwelizwe leli ngele Russia ngoMbimbitho.

EleRussia okwamanje lihlasela indawo ezitshiyeneyo kwele Ukraine njalo selixotshe omele elePortugal kulelolizwe lisithi ilizwe leli lingenela kakhulu kulokhu okwenzakala eUkraine.

UMnu. Ngqabutho Mabhena, unobhala jikelele webandla leZimbabwe Communist Party, uthi eleRussia lilwisana lamazwe amanengi kwele Ukraine.

UMnu. Dumisani Theke Malinga, olandela okwenzakala kwele Ukraine, uthi bekuvele kukhangelelwe ukuba amasotsha akwele Ukraine agonjolozelwe endaweni okwenjiwa insimbi azazinikela kubutho lakwele Russia.

Facebook Forum

XS
SM
MD
LG