amalinks wokungena

Breaking News

Ikhansili Yako Bulawayo leUnion Trust of Zimbabwe Bazama Ukulwisana leDrug Resistant Tuberculosis


Balwisana lomkhuhlane weDrug Resistant Tuberculosis koBulawayo .

Ikhansili yakoBulawayo imanyene labenhlanganiso esebenzisana lozulu eyeUnion Trust of Zimbabwe ekusunguleni umkhankaso wokuhamba belimukisa uzulu mayelana lodubo lofuba osolusehlula eminye imithi abayithi yiDrug Resistant TB.

Emizameni yokumelana lofuba olulenkani lolu olweDrug Resistant TB, abeUnion Zimbabwe Trust baphakathi kokuhamba ezindlini belimukisa uzulu ezweni ngokuqakatheka kokuhlolwa lokwelatshwa ufuba lusaqalisa.

UMnu. Mnu Ronald Ncube, umqondisi weUnion ZimbabweTrust, uthi, “Sisebenzelana logatsha lwezempilakahle eMidlands, koBulawayo leMatabeleland South. Sizaphathisa ngemitshina yokuhlola umkhuhlane weDrug Resistant TB kuthi abafumanwa belawo bathole ukwelatshwa lama food jumpers. Loluhlelo luqale nyakenye njalo kukhangelelwe ukuba luyaphela kumnyaka ozayo.”

UNkosikazi Sitshengisiwe Siziba, obona ngezempilakahle kukhansili yakoBulawayo, uthi, “Isikhathi esinengi umuntu uyabe ekhwehlela phose okwamaviki amabili kuthi abaphila legciwane lengculaza angavele akhwehlele okwelanga elilodwa kumbe amabili sihle sicabange ukuthi uselofuba. Inengi likhwehlela kuphume legazi abanye abakhwabithi ukudla abanye bayaginqa ebusuku.”

Umhlaba jikelele ukhathazekile ngokukhuphuka kwenani labantu abafumanwa belomkhuhlane wofuba olwehlula eminye imithi olweDrug Resistant Tuberculosis.

I-Khansili yakoBulawayo njengazo zonke indawo zelizwe, ibhekane lodubo lolu. Kungalesi sizatho uhulumende lekhansili yalelidolobho besungule uhlelo lokusebenzelana lenhlanganiso yeUnion Zimbabwe Trust kwabekwa inkulungwane eziphose zifike amakhulu ayisithupha zamadola eMelika - $599,000 yokuqhuba lolu hlelo.

Facebook Forum

XS
SM
MD
LG