amalinks wokungena

Breaking News

Izakhamizi zeGaranyemba eGwanda Zixotsha Umphathisikolo Zimethesa Icala Lokweba


Abantwana besikolo (Umfanekiso ogciniweyo)

Izakhamizi zeGaranyemba zithi zixotshe umphathisikolo weGaranyemba Primary eGwanda ngoLwesibili zimethesa icala lobuqili ngoba ebikwa eqambele amanga inhlanganiso ezimeleyo eyama donors eye Edu Foundation ebibhadalela intandane imali yesikolo.

Lanxa imali yama school fees iyi R130 Rands kulesi isikolo, kubikwa umphathisikolo uNkosikazi Audrey Moyo etshele inhlanganiso yama donors ukuthi iyi$20 okuyimali elingana leR300 wasetshayela eyinye esikhewini.

Inhlanganiso yeAbe Edu Foundation esiza abafundi abaswelayo ngokubabhadalela imali yesikolo ibikwa ilahlekelwe ngamadola eMelika angamakhulu amathathu lamatshumi amahlanu i$350 kulandela lesi isehlakalo.

UMnu. Godfrey Moyo ongumgcinisihlalo wenhlanganiso yabazali beGaranyemba Primary utshele umsakazo weStudio 7 ukuthi ngempela bamxotshile umphathisikolo.

Usobhuku uMnu. Mlamuleli Moyo uthi kukhanya sengathi kunengi uNkosikazi Moyo angakuqhubi kahle kungakho bemkhombe indlela.

Lokhu kugcizelelwe nguMnu. Miclas Ndlovu ongukhansila kaWard 13 eGaranyemba.

UMnu Urgent Moyo umqondisi wenhlanganiso yababalisi yeProgressive Teachers Union of Zimbabwe eZansi yemaNdebeleni uthi inengi labaphathi bezikolo lilakho ukulingeka ngenxa yeholo labo eliphansi.

UNkosikazi Moyo kaphendulanga imbuzo esimthumele yona ngaloludaba esithi sikhulume labakhulu bakhe kugatsha lwezemfundo.

UMnu Taungana Ndoro oyisikhulumeli sogatsha lwezemfundo uthi basaluphenya udaba lolu.

Ababalisi bahlezi bekhala ngeholo abathi liphansi, besithi bafuna ukuhola amadola eMelika angaphezulu kwamakhulu amahlanu i$540 ngenyanga ukuze baziphilise lemndeni yabo.

Kusenjalo umbalisi oyedwa labafundi ababili esikolo seGaranyemba Primary batholakale belegciwane leCoronavirus kuliviki, kwathi abalitshumi lambili abagoqela abafundi besikolo seSilonga kuWard 15 eGwanda South labo batholakale bephethwe yileligciwane.

Umbiko okhitshwe lugatsha lwezempilakahle ngolwesine uveza ukuthi eleZansi yemaNdebeleni lihamba phambili ngenani labantu abahlaselwe yileligciwame lona eliphethe abantu abangamakhulu amane 400 okwamanje.

Abezempilakahle bakhuthaza uzulu ukuthi aqhubekele phambili elandela iziqondiso zokuvikela lumkhuhlane njalo ahlatshwe ijekiseni yeCovid 19 vaccine.

please wait
Embed

No media source currently available

0:00 0:04:06 0:00

Facebook Forum

XS
SM
MD
LG