amalinks wokungena

Breaking News

Idale leConCourt Likhuphula Iminyaka Yokuya Emacansini


Court Gravel

Ingcwethi zezenhlalakahle kazulu zithi lokhu kuzaphinda kwehlise inani labantwana abendiswa besesebancane kanye lokuthelelwa imikhuhlane yengulamakwa.

Bulawayo.............Uzulu wamukela ngenjabulo isinqumo esethulwe lidale laphezulu eleConstitutional Court likhweze iminyaka yokuya emacansini bethi lokhu kuzakwenza ukuthi abantwana abangamankazana bavikeleke, kuphinde kwehlise inani labantwana abendiswa bebancane kanye leminye imikhuhlane.

Unkosikazi Plaxedis Moyo osebenza kunhlanganiso elwela amalungelo abomama eyeMthonjeni Women’s Forum uthi njengabomama bayamukela ngenjabulo isinqumo seConcourt.

"Njengenhlanganiso sibonga kakhulu iConsitutional ruling ukuthi ikhwezile iage of consent osokuyi18 years siyakubongela khonokho ngoba kuzakwenza ukuthi kuprotect amankazana kakhulu njengoba besinanzelela ukuthi abantwana bebesendiswa bebancane kwesinye isikhathi umtwana uyabe engakafikisi le18 but ngenxa yokuthi kulomthetho wonalowu wokuthi as long esedlule 16 bekuvuma ukuthi aye emacansini khonokhu bekusenza ukuthi abantwana behlukuluzwe kakhulu nxa sikhangela indaba zemacansini."

Umnunzana Ben Ndlovu isakhamuzi sakoBulawayo uthi lesi sinqumo siqondile kodwa kulobunzima ngoba inhlonipho igugudekile.

“Umthetho ofakiweyo asiwusoli kodwa kulobunzima ebantwaneni bethu ikakhulu amankazana inengi labo kuminyika eqanjwayo babona silingana okusuka kubenzima ukuthi abanye obaba bazibambe bacine bekhombisa. Ungakhangela langendlela abagqoka ngayo kunzima kakhulu kodwa siyabonga ngomthetho ofakiweyo maybe labo sebengazizwela babone umahluko wejaha lomuntu ongaba nguyise lemkhuhlane isingama ukumemetheka."

Unkosikazi Sanelisiwe Nkomo isakhamuzi sakoBulawayo uthi lokhu obesekusenzakala besokuyangisa kakhulu.

“Lokhu obesekusenzakala besekuyangisa kakhulu I kakhulu thina omama ngoba ungananzelela nxa usiya esibhedlela ematernity ward abantwana yibo abagcwele lapho abakhangelelwe ukuba sesikolo. Ungalandelela uzama ukuhlolisisa umuntu onguye ongumnikazi womthwalo ngumuntu omdala kukalutshwane ukuthi abantwana bonane bodwa.Esikufisayo yikuthi abantwana labo abangamankazana bafundiswe kabanzi njalo kubelesijeziso maybe abangasinikwa ukuzebesabe."

Uhulumende wayethule umthetho owehlisa imnyaka yokuya emacansini emnyakeni embili edluleyo. Lokhu kwazondisa uzulu kakhulu ngoba nxa kuqathaniswa lamalungelo afana lokuvota iminyaka evunyelwayo ingaphezulu. Ngalokho omama ababili bemelwa ligqwetha Umnumzana Tendai Biti isiphathamandla sebandla eliphikisayo eleCCC baya edale lemthethwandaba besiyaphikisa isinqumo lesi.

UBiti oligqwetha ukhulume lentathelizindaba zeNewsDay izolo ethi idale selithethe isinqumo sokuthi iminyaka esivumelekile ukuthi umuntu engaya emacansini isisukile kutshumi lasithupha (16) isikutshumi lasificaminwe mbili (18).

Isingqumo esethulwe yiConcourt sithi umtwana oleminyaka elitshumi lasifica minwembili yibo asebevunyelwa ukuthi batshade hayi abangaphansi kwalapho, bethi lokhu kungavikela ukuthi obaba abadala benze ucansi kanye lokuthandana labantwana abangaphansi kweminyaka le kanye lokuvikeleka emikhuhlaneni lezifundweni zabo lenhlonipho ebantwini besifazane.

Ingcwethi ezicubungula ezenhlalakahle kazulu zithi ukhuphangisa ukuya emacansini yikho okubangela kakhulu imitshado abantu bebangcinyane lokuphazamiseka ezifundweni zabo ikakhulu kumantombazana.

Facebook Forum

XS
SM
MD
LG