amalinks wokungena

Breaking News

Badane Okumangalisayo Abantu Kulandela Ukutshona Kwenduna uNhlamba


Umuzi wenduna uNhlamba otshonileyo. (VOA)

Suwile umthunzi wamajahunda kulandela ukukhothama kwenduna uNhlamba wesigabeni seGaranyemba eGwanda esabelweni seMatabeleland South.

UNhlamba ukhothame esibhedlela sakoBulawayo ngoMgqibelo ngemva kokugula okwesikhatshana. Ukutshona kwakhe kulandela ukukhothama kwenduna uMabhikwa oweLupane engozini yomgwaqo kuviki eyedlulileyo. Ukukhothama kwakhe sekutshiye umdeni wako Nhlamba umadolonzima. Sixoxe loMnu. Jefrey Ndlovu Nhlamba, umfowabo wenduna etshonileyo njalo onguSobhuku.

“Sizwa ubuhlungu kakhulu ngalokhu okwenzakaleyo. Ubaba uNhlamba ubegula kodwa ehamba. Lokhu okusehleleyo kube lilanga elilodwa nje waphonguthi kasezwa kuhle wathwalelwa eGwanda, efika eGwanda wadluliselwa koBulawayo walala ilanga elilodwa wavuka izolo ekuseni ephela.”

UMnu. Wilson Mabhena, obesebenza leNduna uNhlamba lapho kuthoniswa amacala, uthi balahlekelwe kakhulu.

“Kubuhlungu kakhulu okumangalisayo ngumuntu okade ezithulele, thina sikhulile siyakwazi ukuthi izinduna bezisenza njani kodwa lowu ebengumuntu ozithobileyo kodwa akulanto esingayenza uNkulunkulu sekhethe okwakhe akula esingakwenza sibonga kunjalo.”

UMnu. Collins Sibanda, isakhamuzi seNtepe, uthi basele besegcekeni njengamajahunda.

“Silusizi kakhulu ngokuzwa ngokubhubha komphathi wethu , ukuhamba kwakhe kusitshiya sisesithubeni esinzima kakhulu ngoba lapho okuhambe khona umuntu omdala kusale kulesikhexe esingaba nzima ukuthi sigcwaliswe, ngamafitshane sithi umdeni wakhe ududuzeke.

UKhansila weGaranyemba kuWard 13, uMnu. Miclas Ndlovu, uthi uNhlamba ebehlezi elwela intuthuko esigabeni sakhe.

“Ubusithi ungafika kuye okwakhe vele uzikhulumela ngentuthuko yesigaba, isizwe sakithi sesilahlekelwe, ebekhuthaza kakhulu ukubambana kwabantu kungakho ukuhamba kwakhe kubuhlungu kakhulu ngoba iphupho lakhe useze wahamba iphupho lakhe lingagcwalisekanga kodwa kungasenani yintando kaNkulunkulu sithi ngabe kuyavela olunye uhlumela olunjengaye.”

Induna uKhulumani Mathema uthi ukukhothama kwezinduna kutshiya izigaba zingumhlambi kazelusile.

“Izinduna ziqakathekile kakhulu ngoba abantu bakithi bayakholwa kakhulu bekholelwa imsebenzi eyenziwa yizinduna ngoba yizo ezikhuzayo ngoba lapho okulenduna khona ukudlephana kwakhona kuba ngaphansi kulalapho osekuswelakale khona induna.”

Aqhubekela phambili amalungiselelo okubeka induna uNhlamba. Induna uDenis Ndlovu Nhlamba wathwetshulwa yingwe ngomnyaka ka1947 njalo wagcotshwa ukuba yinduna yeGaranyemba ngomnyaka ka2010.

Facebook Forum

XS
SM
MD
LG