amalinks wokungena

Breaking News

Abamabhizimusi Amancane Bakhala Ngokuwa Kwesisindo seDola leZimbabwe


Zimbabwean Bond Notes
Zimbabwean Bond Notes

Inengi labosomabhizimusi lithi kungalesi sizatho abacina bebanjwa ngamandla ukufaka intengo zabo ngedola leMelika bebalekela ukuwa kwesisindo seDola leZimbabwe.

Bulawayo......................

Ngokutshona kwelanga langoMvulo ibhanga elikhulu lesizwe, ele Reserve Bank of Zimbabwe, belisithi idola leMelika belithengwa ngamakhulu phose amathathu amadola eZimbabwe(ZWL$308.52:US$1), ikanti ezitaladeni belithengwa ngamakhulu phose amahlanu-(ZWL $480:US$1).

Isilinganiso sokwehla kwesisindo semali yakuleli nxa uqathaniswa leyamane amazwe i-Inflationa ngalinyanga kaNkwenkwezi besisedlula isilunganiso sokuphethwe kabili(131,7%) sisuka ku(96,4%) ngenyanga kaMabasa.

Umnumzana Thabisani Bhebhe olesitolo esithengisa ukudla uthi kulezinsuku kunzima ukufaka intengo ngedola leZimbabwe ngoba likakho ukuwa phakathi kwesikhathi sebethengile becine besehluleka ukuyathenga ezinye impahla njalo.

“Kunzima ukuba lebhizimusi ngalesisikhathi ngoba sekumele ucabangele phambili , ucabange ukuthi nxa ngingathenga lokhu ngikuthengise ngemali engaka ngizabe ngizathola inzuzo na ezangenza ngibuyele ukuthi ngithengise njalo ngibuyele ngithenge okunye ngibuyele ngithengise. Ngesikhathi lesi siyakhangela ukuthi ama rates ayabe elokhe eqansa. Ngelanga uyabelisa ukuthi kuvuke idola liyi four hundred lisiyatshona ilanga seliyi four hundred and ten okuyinto enzima kakhulu kithi osomabhizimusi ukuthi uyabe uzafaka njani intengo zakhona zibe ngama Zim dollar. Kungcono mhlawumbe ngabe ama prize eyiForex.”

Umnumzana Effort Ncube umqondisi wenhlanganiso eye National Consumers Rights Association uthi impahla zingaba lentengo ebekwa ngamaRands kumbe iDollar leMelika kuzakuba lula.

"Vele izinto ziyadula kakhulu njalo ziqhubeka zikhwela intengo yazo nxa ngabe zithengiswa ngemali yaseZimbabwe. Ngakho ke kuqakathekile ukuthi kukhangelwe ukuthi kuphangise ukusetshenziswa imali yakwamanye amazwe enjengama Rand kumbe amaDollar ukuze abantu abathengi bavikeleke. Ngokubizinto nxa zithengiswa ngamaDollar kumbe ngamaRand ziyahlala ndawonye isikhathi eside, kuyabe sekusitsho njalo ukuthi abantu bebhadalwe njalo leyomali laphbasebenza khona. Kungabe besebenza kuHulumende kumbe kumaPrivate sector.”

Umnumzana Thabiso Ndlovu umhlali wakoBulawayo uthi amankampani afana loZupco akhuphula imbadalo esebenzisa isisindo semali esiphezu kwesisindo sika hulumende.

“Kunzima sibili ngoba sibhekane lohlupho olukhulu, impilo sinzima. Imali yeholo ayikhweli, kukhwela amaGroceries, kulanti ama services lokhe ekhwezwa. Ungakhangela lakuZupco okunguye okahulumende, khathesi kusukela mhlaka one Bathi iDollar labo yi four hundred and fourty bond, okuyinto ephezulu kulaleyi i rate eye government. Sebe encourager leBlack market ukuthi ikhweze ibe phezu kwayonaleyi.”

Umnumzana Ernest Mvundla ingcwethi ecubungula ezomnotho uthi kulokusilela kwemali yakwamanye amazwe elizweni okuyinto ekhuphula intengo yayo nxa umuntu eyidonga ngemali yakuleli.

“Okumqoka esingakunanzelela yikuthi impahla ezinengi ezithengiswayo, abamankampani bathenga labo nge forex. I forex leyi ibuye njalo isilele, lapho usuyithola usuyithenga ngemali ephezulu. Ukuqansa kwentengo vele kukhangelelekile. Uhulumende engakhipha eyalapha imali kusetshenziswe eyeMelika, lokhu kuzaletha ukuhlaliseka kwentengo. Lama investors azakuba le confidence ukuthi afake imali engasoke iwe isisindo njalo nje. I dollarization yiyo engaphathisa ukusa umnotho welizwe loba kubanjwe abaphethe i black market.”

Abenhlanganiso ebona ngelungelo labathengi eye Consumer Council of Zimbabwe bathi ngenyanga kaNkwenkwezi imali ebikhangelelwe ukugcina imuli yabantu abayisithupha ibisifike kumadola aphezu kwenkulungwane ezilikhulu(ZWL $120 000).

Ingcwethi kwezomnotho zithi uhulumende kumele afake indlela ezizathuthukisa ukulungiswa kwempahla elizweni (value chains) okuzaphathisa ukwehlisa intengo zempahla. Okungenziwa nguhulumende yikuboleka osomabhizimusi imali ngesilinganiso semithelo esiphansi, eye interest rate kanye lokunanzelela ukuba amankampani athola imali yangaphandle kwelizwe emkambo kahulumende (auction system) ukuba ayisebenzisa ngendlela efaneleyo, ethuthukisa umnotho welizwe hatshi umkambo omnyama.

XS
SM
MD
LG