Induna yeGaranyemba, uNhlamba, elokuzalwa enguMnu Denis Ndlovu, ubekiwe lamhlanje emzini wayo eCauseway eNtepe lapho izikhulumi ezikhuthaze uhulumende ukuthi anakekele abafelokazi bezinduna.
UNhlamba ubhubhele esibhedlela sakoBulawayo ngoMgqibelo kuviki eyedlulileyo ngemva kokugula.
UNhlamba wathetshulwa yingwe ngomnyaka ka1947 njalo wagcotshwa ukuba yinduna yeGaranyemba ngomnyaka ka 2010.
Utshiye umkakhe labantwana abambalwa.
UKhansila kaWard 14 eSengezane uMnu Phineas Maphosa uthi uhulumende kumele asungule inhlelo zokuphathisa abefelokazi beziNduna ukuze bengasali bedubuka lapho bethe batshiywa ngomkabo.
“Kulendlela yini abasala begcinakale ngayo ngcono ukuze baduduzeke phela bengakhumbuli ukuthi ikhosi lami engangihlezi lalo lisaphila ngangihlezi kuhle nganginatha itiye kathesi angisayitholi.”
Lamazwi agcizelelwe yiNduna uMbiko Masuku oweMatshetsheni othi laye abafelokazi beziNduna kumele banakekelwe.
“Abakhokheli bomdabu laba elibakhangeleyo babuya phambili kwenu begqokile bedlile bebahle begeziswe ngomama ababatshiye emakhaya akungabi mnyama kuphela mhla ubaba ehambile umama laye athole omondlayo.”
USobhuku uMnu Zephaniah Hobane uchaze umuyi njengomuntu obelenhlonipho.
“Thina njengamasobhuku kababa uNhlama silahlekelwe kakhulu ngumuntu obesisebenza laye kakahulu ,ubekwazi ukuhlonipha umuntu kungenanai lesikhundla sakhe, ubefikeka amaprojects besisebenza silaye sisebenza kuhle kakhulu."
Umphathintambo wezenzakala eZansi yemaNdebeleni uMnu Abedinico Ncube uthi badabukili ngokukhothama kukaNhlamba.
“Sibuthene lapha kulandela ukuhamba kukababa uNhlamba okuyinto esithinthe kabanzi ngithanda ukuthi nginxuse wonke umuntu olapha ukuthi alandele inyawo zikaChief ngemisebenzi yakhe emihle.”
UMnu. July Moyo ongumphathintambo wezabelo ,obemele umsekeli kaMongameli welizwe uMnu Constantino Chiwenga , ududuze umdeni wakoNhlamba.
“Mina njengomntwana kamaSiziba nginxusa kakhulu umama uMaSiziba ukuthi aqine asale esebenza lalo ozasala ebambe umsebenzi ukuze umsebenzi uqhubeke ngendlela eqondileyo.”
Induna yeBubi uMnu Mtshane Khumalo ukhuthaze amaJahunda ukuthi engaxege imuli yakoNhlamba ekukhetheni ozangena esikhundleni.
“Asingabi yithi esenza ukuthi abemuli yalowo okumele athathe senze baxokozele akube yinto nje ehambayo njengoba kujayelekile ngesintu sakuwonaleyo indawo ukuthi nxa sekwedlule lumuntu onganayo ngulo.”
Ngomnyaka ka 2016 uNhlamba wathi ilizwe le Zimbabwe alisoze liphumelele kungela Mnu. Robert Mugabe owayengumongameli welizwe ayemncoma esithi ungumkhokheli oqotho.
