amalinks wokungena

Breaking News

Abadabuka eZimbabwe Abalungisa Amaphepha Amatsha Okuhlala eSouth Africa Baxwayiswa Ukuba Beqaphele Izigangi Ezidinga Imali


FILE - Abadabuka eZimbabwe balungisa amaphepha abo eJohannesburg kwele South Africa.

Izizalwane zeZimbabwe ezilamapermit amiswa ukusebenza kwele South Africa sezikhuthazwe ukuthi ziqaphele amaganyana asegcwele ebulenjini be internet esithi ayenelisa ukubasiza ukuthola olunye uhlobo lwamapermit.

Uhulumende weSouth Africa uphe izizalwane zeZimbabwe ezilamapermit ohlobo lweZimbabwe Exemption Permits kuze kuyefika uMpalakazi, ukuthi babe sebethole olunye uhlobo lwamapermit kumbe nxa kungenjalo baphume baphele elizweni.

Kodwa inengi liyehluleka ukuphumelela kuzicelo zamanye amapermit la njengoba bengelakho okufunekayo. Lokhu sekwenze kwahluma amankampani esiphangiphangi ebulenjini be internet esithi ayenelisa ukusiza abeZimbabwe laba. Inengi labo bafuna umuntu abhadale imali ethile ukuze ethule udaba lwakhe kubo, bese umuntu eqhubeka ebhadala ngokuqhubeka kohlelo lokufaka izicelo.

Intathelizindaba yeZimbabwe, uMxolisi Ncube, uthi iqiniso yikuthi vele inengi lezizalwane zeZimbabwe kabasoze bawathola amapermit la okuthiwa bafake izicelo zokuwathola.

“Abantu abanengi abayikwenelisa ukuthi bathole amapermit amatsha eSouth Africa ngoba amapermit la aweZimbabwe Exemption Permit abawathweleyo eza ngokuthi abenelisi ukuthi bathole amanye amapermit abevele ekhona ngenxa yokuthi abanayo imfundo elingeneyo kumbe ngithi mina amaskills angabenza ukuthi bathole amapermit aseSouth Africa.”

Inengi labeZimbabwe laba ngabantu abebezisebenzela ezindlini, abanye bethengisa ezitaladeni kanti abanye bebezenzela imisebenzi engadingi kufundelwa.

Uhlupho yikuthi amapermit okufanele bangene kuwo afuna umuntu owenza umsebenzi ongeke wenziwe yizizalwane zakweleSouth Africa. Le yimisebenzi yamakhono aphezulu ebhalwe phansi lugatsha lwendaba zasekhaya.

Kungehlula lapho umuntu kuzafuze abethethwe yisizalwane sakweleSouth Africa, kumbe abengumtwana womzali oseyisizalwane sakweleSouth Africa lamanye amapermit anzima ukutholakala.

UMnu. Nqqabutho Mabhena, umgcinisihlalo wenhlanganiso yeZimbabwe Community in South Africa, uxwayisa izizalwane zeZimbabwe ukuthi zingavumi ukudlelwa imali yizigelekeqe ezizula ebulenjini be internet.

“Labo ngabantu abazidingela imali. Angithi vele nxa abanye abantu behlupheka abanye bavuka ngabahluphekayo. Akulanto abazabancedisa ngayo ngoba yonke into ibhaliwe ukuthi umuntu kumele alandele imigomo ebekiweyo, ama requirments okuthi nxa kumele ube lepermit kuyini okumele ukwenze. Laba abantu abakhuluma ngathi bona sebebhadalisa abantu, engani bakhuluma labantu abaphakathi eHome Affairs basenga ezimithiyo akulanto abazayenza.”

Kusenjalo, inhlanganiso ezimela abeZimbabwe laba zithi azikezwa ngomuntu obelaloluhlobo lwepermit, esenza umsebenzi ongelakhono, osethe waphiwa olunye uhlobo lwepermit. Zithi zikhangelele ukuthi banengi abazazithola sebeselizweni ngokungekho emthethweni ekupheleni komnyaka okuyinto ezakwenza impilo yabo ibenzima kakhulu kweleSouth Africa.

Kodwa ugatsha lwendaba zasekhaya lusanda kuthumela izincwadi ebantwini abalamapermit la lubakhuthaza ukuthi bafake izicelo ngoba okwakhathesi balutshwana kakhulu asebethe bafaka izicelo.

Facebook Forum

XS
SM
MD
LG