amalinks wokungena

Breaking News

Abongi Labongikazi Abanengi Abahola Imali Ephansi Sebebaleka eZimbabwe


Abongi labongikazi eZimbabwe bakhala ngeholo eliphansi.

Abongi labongikazi abakhala ngeholo eliphansi sebesuka ngobunengi babo eZimbabwe besiyadinga imisebenzi kwamanye amazwe.

UMnu. Antony Majongosi, umgcinisihlalo weZimbabwe Nurses Association KoBulawayo, uthi abongi sebebalutshwane kakhulu elizweni.

“Khathesi sibona ukuthi amanurse malutshwane ezibhedlela ngenxa yokuthi inengi labo sebesiya kwamanye amazwe ngenxa yeholo eliphansi eZimbabwe. Siyafisa ukuthi sihole idollar kodwa uhulumende usiholisa ngerate yabo. Lokhu kwenza ukuba abongi abanengi bebaleke elizweni beyedinga imisebenzi kwamanye amazwe. Abaseleyo sebesebenza nzima.

Umongikazi uNkosikazi Sanele Nyoni uthi sokunzima ukusebenza ezibhedlela lemakilinika eZimbabwe kulandela ukubaleka kwabanye bakhe.

"Silokudana kakhulu ngalokhu okwenziwa nguhulumende kasifiseli okuhle lezimuli zethu sizamile ukukhulumisana laye mayelana leholo kodwa akulanto etshintshayo lokhe kufana. Khathesi inengi lamanurse libone ithuba lokuthi bayesebenzela phandle kwelizwe usokubangela ukuthi sisale sibalutshwane osokusenza ukuthi lomsebenzi ubemnengi kakhulu kithi esiseleyo njalo kuzabangela ukuthi abantu bacine bengelatshwa bonke.

Omunye njalo umongikazi, uNkosikazi Sikhululekile Nyathi, uthi ulungiselela ukusuka eZimbabwe.

“Ngizama ukulungiselela ukuhamba kodwa uhlupho engilalo khathesi yimali efunakayo. Abaqhatsha abongikazi ama agencies bafuna imali efika inkulungwane eziyisithupha lengxenye zempondo zakwele Bhilithane – 6,500 pounds. Kunzima ukuthi ngihlanganise imali le nxa ngikhangela iholo lami. Bengicetshiswa ngomunye ukuthi kufanele ngikhangelisise i-contract yami lo-agent ngoba labo sebethatha ithuba leli ekudingeni imali.”

UDokotela Edwin Sibanda, umqondisi wezempilakahle kukhansili yakoBulawayo, uthi ukuhamba kwabongi sekwehlise izinga lokusebenza kwamakilinika kanye lengatsha zempilakahle.

“Amanurse ayahamba ngenxa yokuthi asiholisi imali yaphandle kuholwa imali yalapha nxa kungabuya esisebenza labo esithi ngamapartners befuna abongi labongikazi ukuthi babasebenzele bebhadala ngemali yaphandle bavele basuke kithi bengasiniki lenotice …”

Okwakhathesi abongi bachaze ukuba abala lwazi lokuba iholo labo lingakanani ngoba bengatholi incwadi ezichaza lokhu. Kodwa ngenyanga ephelileyo kuNkwenkwezi bahola amadola angamatshumi ayisikhombisa lengxenye emali yakuleli (ZWL $75 000). Bathola lamadola alikhulu lamatshumi ayisikhombisa lengxenye emali yeMelika (USD175).

Facebook Forum

XS
SM
MD
LG