Ophethe isikhundla sikamongameli wenhlanganiso yeZimbabwe Football Association uGift Banda uthi kudingakala ukudonsa kanye kanye ukuze ilizwe leZimbabwe libuyele libe yingxenye yemuli yeFIFA.
Ekhuluma emhlanganweni awubize ngoLwesihlanu esigodlweni eHarare, uBanda uthe kumele inkokheli zomdlalo wenguqu elizweni zisebenzisane ukuze umdlalo lo uvuselelwe.
“Ukungaboni ngaso linye kukhona emdlalweni wenguqu kodwa mina lebhodi yami asilandanga ukuzokhetha abantu kumbe ukuphindisela kodwa silande ukuzothuthukisa umdlalo wenguqu. Sizavumelana sonke ukuthi abadlali beqembu elithile bengabe bengasibo bangane kodwa bengavele bavunule amakawuso afananayo kumele badlale ngokuzwanana ukuze banqobe. Ngalokho ke ngithi bonke labo abangabhemisani lathi kabasondele ukuze sibambisane sidonse kanye kanye.”
UBanda ukhethwe zinkokheli zomdlalo wenguqu ukuba akhokhele inhlanganiso yeZimbabwe Football Association njalo uthethe isikhundla sikaFelton Kamambo, obenguye umongameli weZifa, kusithi yena uBanda ubengumsekeli wakhe kodwa ubesevalelwe phandle esetheswa icala elokukhetha abaqeqetshi abatsha abeqembu lesizwe engelamvumo.
UBanda utholakale engela cala kodwa inkokheli kaKamambo iqhubekele phambili imvalele phandle. Kuthe-ke uKamambo labanye bakhe ababalisa uPhilemon Machana kanye loBryton Malandule sebemiswe umsebenzi, amakhansila enhlanganiso yeZifa asekhetha uBanda ukuba abe ebambe isikhundla sikamongameli. Ekhuluma ngoLwesihlanu uBanda uthe imizamo yokuvuselela umdlalo elizweni ivele isiqalile njalo bazaqhatsha umqeqetshi omutsha oweqembu lesizwe.
“Sizahlala phansi labanye bami sixoxe ngodaba olokuba siqhatshe umqeqetshi omutsha oweqembu lesizwe. Mina ngokwami ngingathakazelela ukuba kube ngumuntu oyisizalwane sakuleli ngoba akusilo qiniso ukuba labo abavela phandle yibo kuphela abakwazi umsebenzi.”
Umnikazi weqembu labasakhulayo eleGolden White, uKhotso Nyathi, uthi bekungangcono ngabe kulungiswa inhlelo zabasakhulayo kulokuba kuqhatshwe umqeqetshi weqembu lesizwe.
“Kasikezwa kakhulu ekhuluma ngeligi yabasakhulayo ngoba yikho lapho okuphekwa khona kuphakululwe khona imbiza. Yiyo inhlanyelo yakusasa eyiyo esiyithembileyo ukuthi sizathengisa emazweni njalo nxa singela inhlanyelo angiboni ukuthi sizavuna.”
Ilizwe leZimbabwe lamiswa ukudlala lamanye amazwe ngemva kokuba inhlanganiso yeSport and Recreation Commission imise umsebenzi ibhodi yeZifa ekhokhelwa nguKamambo. Kulezinsuku amanye amazwe awezwekazi laseAfrica aphatheka kumkhankaso owokudinga amaqembu azakuyadlala kumncintiswano wokudinga intshantshu zezwekazi owe Africa Cup of Nations kodwa eleZimbabwe lona kalidlali.
Sikhangele umdlalo kakhilikithi: Iqembu labesilisa elimela ilizwe emdlalweni kakhilikithi namhla linqotshwe nge 21 runs ngele Afghanistan emdlalweni wesibili owohlobo lweTwenty20 oqhutshelwe eHarare namuhla emini.
Limpumela yanamhlanje itsho ukuba iqembu leAfghanistan selinqobe eleZimbabwe kumncintiswano owemidlalo eyohlobo lweT20 njengoba linqobe lakumdlalo wakuqala ngoMgqibelo ngama wickets ayisithupha.
Umdlalo owesithathu njalo ungowokucina ukhona ngoLwesibili enkundleni yeHarare Sports Club.