Kuyaxokozela emzini womdeni kamuyi uNkosikazi Moreblessing Ali, obulewe ngabantu abacatshangelwa ukuba ngabalandeli bebandla leZanu PF.
Abakubandla leZanu PF kubikwa ukuba bahlasele abakubandla leCitizens Coalition for Change ngoLwesibili eNyatsime esigabeni seBeatrice kwathi amalunga eCCC atshisa umuzi wesiphathamandla sebandla elibusayo, okubikwa ukuba uthwalise nzima abaphikisayo.
Amalunga ebandla leCCC atshele iStudio 7 ukuthi abanye babo balimele kulandela ukuhlaselwa kwabo ngamalunga eZanu PF besesililweni sikamuyi.
Ekhuluma esemzini wako Ali eNyatsime, uMnu. Nelson Chamisa, umkhokheli webandla leCCC, uthe kubuhlungu kakhulu ukuba omunye wabo ubulawelwe ezombusazwe.
UChamisa uthi akulamuntu okumele afele ezombusazwe esithi okwenzakala elizweni kuveza sobala ukuba inguquko isiseduze.
UChamisa ukhuthaze amalunga ebandla lakhe ukuba engenzi udlakela esithi lokhu yikho okufunwa ngabantu ababulele uAli.
Umtakamuyi, uSilence, uchasise ngababhekane lakho.
Isikhulumeli sebandla leZanu PF, uMnu. Tafadzwa Mugwadi, uthi ibandla lakhe alilani lodlakela lolu.
UNkosikazi Ali ucatshangelwa ukuba wabulawa ngodlelana lebandla leZanu PF, uPius Jamba, odingwa ngamapholisa athi wayethandana laye. Kodwa ibandla leCitizens Coalition for Change lithi uNkosikazi Ali wabulawa ngamalunga ebandla leZanu PF.
Kusenjalo, amapholisa asebophe umkhokheli wenhlanganiso yeAmalgamated Teachers Union of Zimbabwe, uMnu. Obert Masaraure, oyisikhulumeli njalo esenhlanganiso yeCrisis in Zimbabwe Coalition. Inhlanganiso le ithi akwaziwa ukuba ubotshelweni uMasaraure kodwa kusobala ukuba ubotshelwe ezombusazwe.
Asenelisanga ukukhuluma lesikhulumeli samapholisa, uAssistant Commissioner Paul Nyathi, obengaphenduli umakhalekhukhwini.