amalinks wokungena

Breaking News

Asebhidlika Amabhizimusi koBulawayo Ngenxa Yokugugudeka Kwedollar leZimbabwe


Sebethwele nzima abalamabhizimusi eZimbabwe ngenxa yokugugudeka kwedollar lelizwe.

Osomabhizimusi abanengi koBulawayo bathi sebesehluleka ukuqhuba ngemfanelo amabhizimusi ngoba sebebalutshwana abantu abathenga impahla etshiyeneyo esibiza imali ephezulu.

Bathi ukugugudeka kwedola leZimbabwe kubathwalise nzima ngakho-ke abanye babo balakho ukubhidlikelwa ngamabhizimusi nxa isimo somnotho singaguqukanga elizweni.

Kulezinsuku akusela kuxokozela ezitolo ezinengi okuthengiswa ukudla lempahla ngoba akuselabathengi abanengi. UNkosazana Lwazi Mbowa uvale ibhizinisi yakhe yempahla zendlini ezifana lama sofa lama fridge lezitofu ngenyanga ephelileyo.

"Kade ngingomunye wama business people akoBulawayo kodwa hayi into zinzima azimanga kuhle, akusasebenzeki imali zamarent asiselazo, imali iwa nsukuzonke. Ungathengisa ulutho namuhla nge ZWL$13,000 nxa susiyaluwoda ufice soluyi ZWL$50,000. So, konke konke khonokhu kusibisela emuva ,akuselanto esingayenza sesihlezi kuphela."

UMnu Thompson Moyo laye uthi sokukubi kubhizinisi lakhe.

"Ibhizisinisi kulezi nsuku ayihambi kuhle,abantu bayakhala abalamali . Lama buildings lapha koBulawayo bayadura abanikazi bama buildings so sithwele nzima kakhulu . Senz'okwe printing photocopying. Eskhathini uyahlala 2 hours kungene umuntu oyedwa."

Edolobheni lakoBulawayo ukuphaka imota sokubhadaliswa, amabhizimisi amanengi aselahlekelwe ngabathengi yona imali isivele ingasekho.

UMnu. Charles Ncube ulebhizinisi elithengisa ukudla.

"Ngileshop lapha etown eyokuthengisa ukudla so lokhe kwabuya umthetho lo owe parking omutsha okwamanje imota azisakwanisi ukubuya ziphakha lapha abantu abasakwanisi ukubuya bethenga ukudla . So sokuze kungifosa ukuthi ngicine sengivala ishop."

UNkosazana Bonginkosi Ndlovu uthi kubi kubhizimusi lakhe lokuthengisa ama computer.

"Hayi ilizwe lethu leli alisamanga kahle eversince kwatshintsha ibond leli,abantu abasabuyi ukuzothenga ,into ziwomile wonke umuntu uyakhala ,njalo lento zikhwelile . Yikubekezela lokuncengisa but langapha ama rent ayafunakala lalokhu lalokhu okunengi kuyafunakala . Okunye isituation nxa sinzima siyacina sesizivalela amashop."

UNkosazana Blessing Mpande, ingcwethu kwezonotho, uchaza isizatho esenza amabhizimisi agalule kulezinsuku.

"Abantu abanengi siyananzelela ukuthi bahola nge RTGS . Ukuthenga kwabo lokusebenzisa kwabo imali akusafanani lokusebenzisa imali okwakukhona emandulo . Abantu abaselayo imali yokuthi babebethenga abazisebenzisa nsuku zonke ezindlini amabhizimusi ayaluza imali enengi ayalahlekelwa yimali enengi ngezikhathi ezinengi . Ngakho ke amabhizimusi abona kungcono ukuthi avale ngoba abantu abaholi ngemali yaseMelika abaholi ngitsho wona ama rand ase South Africa, yingakho sibona amabhizimusi amanengi evala kulezinsuku."

Kukhanya engani manengi amabhizimusi azavala lonyaka ngenxa yokugugudeka kwedola leZimbabwe okwenza abantu behluleke ukuthenga impahla abayifunayo.

Facebook Forum

XS
SM
MD
LG