amalinks wokungena

Breaking News

Kuyaqhubeka Ukukhalala Umsebenzi KwaBongi eZimbabwe


Striking Parirenyatwa Hospital Nurses

Abongi labanye abakumsebenzi wezempilakahle namhlanje batshengisele esibhedlela esikhulu ese Parirenyatwa bethwele amabhakani, bebhoda ngesibhedlela lesi behlabela besithi iholo labo aliseneli lutho.

Harare.................

Ukutshengisela kwabakumsebenzi wezempilakahle ngokungayi emsebenzini kungene kusuku lwesibili Ngolwesibili. Lanxa zikhala ngokwethuselwa ngumqatshi, izisebenzi zithi zizaqhubekela phambili zitshengisela.

Abongi labanye abakumsebenzi wezempilakahle namhlanje batshengisele esibhedlela esikhulu ese Parirenyatwa bethwele amabhakani, bebhoda ngesibhedlela lesi behlabela besithi iholo labo aliseneli lutho.

Basuke lapho baya emahofisini awe Health Services Board (HSB) lawo aduze lesibhedlela njalo lokhu bekusenzakala amapholisa ebukele.

Ekhuluma lezisebenzi lezi unobhala wenhlanganiso emele izisebenzi zezempilakahle eye Health Apex Council uMnu Lloyd Sarau uthi akula okuphume emhlanganweni wabo le HSB NgoMvulo. Uthe ezinye indaba abafuna zilungiswe ngezeholo, isimo somsebenzi ezibhedlela lokuba bathole imfanelo zokusebenzisa ezibhedlela.

“Siyaqhubeka sitshengisela ngoba iholo esiliphiwayo kaleneli liutho. Siphakathi komhlane lembeleko”

Uthe njalo uhulumende kabaqakathekisanga ngomsebenzi abawenza ngesikhathi se Covid-19. Uphinde wasola labo abangafuni ukutshengisela esithi lokhu kubabisela emuva.

“Kumele sonke isesebenzi siphatheke ekutshengiseleni lokhu ngoba kulilungelo lethu. Singaze sethuselwe akumelanga sesabe”

Uqhubeke esithi uhulumende le HSB kumele akhulume labo abanikeze iholo elingcono kulukuba azithulele nje.

Inhlanganiso ye Health Apex Council ifuna ukuba isisebenzi esihola imali encane siphiwe amadola afika phose inkulungwane USD840.

Asenelisanga ukukhuluma labe HSB ngoba umholi wabo u Dr Paulinas Sikhosana ube engasabeli ucingo.

Kusenjalo ukutshengisela okwenziwa ngababalise kuyaqhubeka besithi ukwengezwa kweholo nguhulumende akubasizi.

Elinye ilunga le Progressive Teachers Union (PTUZ) uNkosikazi Phylis Sithole uthi ababalisi bazaqhubeka bekhalala umsebenzi ngoba bethwele nzima.

“Imali esiyiholayo kayeneli lutho. Ngabe uhulumende uyasizwela engenze iholo lethu ngedola le Melika ngoba vele asisaholi lutho”

Ingcwethi ezicubungula ezomnotho zithi abantu kabesenelisi ukuziphilisa ngesimo somnotho esiselizweni, inengi lbhekane lendlala osekusenza abanye bathi uhulumende ka Ian Smith owabahuquluzi wawungcono kuloka Mongameli Emmerson Mnangagwa.

Kodwa ekhuluma endaweni ebekwa amaqhawe izolo uMnangagwa ukuphikile lokhu esithi uhulumende wakhe ungcono kakhulu ngoba abantu bekhululekile ukuziphilela ngcono bengancindizelwa loba ukubanduulwa.

Facebook Forum

XS
SM
MD
LG