amalinks wokungena

Breaking News

Bavalelisa Umuyi uAlex Magaisa eHarare


Alex Magaisa died two weeks ago in London. His memorial service was in Harare on Sunday.

Abantu abanengi namuhla bavalelise umuyi uSikhwicamfundo Alex Magaisa, obefundisa kwele Bhilithane njalo obesaziwa ngokuloba okujulileyo ngokwenzakala eZimbabwe.

Bekulezihlobo, abangani labanye eHarare Showgrounds obekusenziwa isikhumbuzo sika Magaisa.

Abanye abavalelise uMagaisa nguMnu. Nelson Chamisa, umkhokheli webandla leCCC, owayengumsekeli womkhokheli welizwe uMnu. Arthur Mutambara, uSikhwicamfundo Ibbo Mandaza, uSikhwicamfundo Lovemore Madhuku, uMnu. Simba Makoni, umkhokheli webandla leMavambo-Kusile Dawn labanye. Omele umdeni kamuyi, uMnu. Robert Magaisa, uthe balahlekelwe kakhulu.

“Kwaba nzima kakhulu kithi lapho sisizwa umbiko wemfa yakhe. Silahlekelwe liqhawe, kodwa siqhubeka sikhuleka kuMdali ukuthi amlondoloze lapho akhona.”

UChamisa laye uthe ilizwe leZimbabwe lilahlekelwe yindoda emadodeni.

“UMagaisa wayengela sikhundla kodwa wayefuna inhlalakahle yabantu elizweni leZimbabwe. Lubaba utshiye imbali emangalisayo, eyokuzehlisa, eyokuzinikela ukusebenzela abanye, lembali yobuqotho. Akazange abuyele emuva kulokho.”

UMnu. Daniel Molokele, olilunga ledale lephalamende njalo owafunda eUniversity of Zimbabwe lapho okwafunda khona umuyi, uchasisa ngokunye okwenziwa nguMagaisa.

“Ngingathi ekolitshini leUniversity of Zimbabwe ngisebenze laye kakhulu ngo1996 ngingu-Acting President we University of Zimbabwe Student’s Union, lapho engasungula khona uhlelo lokwakhiwa kwesisekelo sombuso esitsha seUZ Student’s Union, esingathi yi-Constitutional reform. Ngafaka i-Constitutional Commission, engahlangana during one of the vacations on holidays and u-Alex Magaisa was one of the people who were actively involved ukuthi kwakhiwe isisekelo sombuso esitsha eUZ.”

UNkosiakzi Rosline Gwese, okubandla leLabour, Economists and African Democrats uthi uMagaisa wayengumuntu wabantu.

“Njenge LEAD party, sikhala nje labo bonke abakoMagaisa sibaduduza nje sisithi hayi, kasikhaleni silethemba. Ngakho ke sibone ukuthi uMagaisa wabamba umsebenzi omkhulu ngesikhathi laphana kusenziwa iConstitution yeZimbabwe, waphatheka sibili phakathi kweConstitution, lalamuhla lokhu yiyo esiyisebenzisayo ngakho ke thina siyakhala nje lelizwe lonke ukuthi silahlekelwe thina.”

UMfundisi Milson Moyo, okunhlanganiso yeZimbabwe Christian Alliance, uyakusekela lokhu.

“Nxa ngimkhumbula, ungikhumbuza kuhle umbhalo othalakala ku-Isaiah 1 i-verse ngelika 17 othi fundani ukwenza okuhle, sifune ukwahlulela kuhle, liqondise abacindezeli, lahlulele izintandane, limele ufelwakazi. Nansi impilo ubaba uAlex T Magaisa ebengibona eyiphila ngesikhathi esaphila, ngiyamkhumbula ngayo.”

UMnu. Joseph Tshuma, ilunga leCentral Committee kubandla leZanu PF, uthi uMagaisa uyiphilile impilo yakhe ngakho-ke “nxa mina ngikukhangele ngithi hayi, kalale ngokuthula uMagaisa, ibanga lakhe uselidlalile. Whether kubi komunye kumbe kuhle komunye kodwa yena usekuqedile okwakhe kulo umhlaba, kalale ngokuthula, yindlela yethu sonke.”

UMagaisa wabulawa yisifo senhliziyo. Wake wasebenza ewofisini kowayengumkhokheli webandla leMDC-T, umuyi uMorgen Tsvangirai. Ngaphandle kokuba ligqwetha njalo lokufundisa amagqwetha eKent University kwele Bhilithani, uMagaisa ubikwa wayethanda konke okuthandwa nguzulu, okugoqela umculo kaSimon Chimbetu.

Facebook Forum

XS
SM
MD
LG