amalinks wokungena

Breaking News

EleZimbabwe Lithi Kuzasetshenziswa Imali Etshiyeneyo Kuze Kufike Umnyaka ka2025 Labantu Sebevunyelwa Ukuthengisa Impahla Ngedola leMelika


UMnu. Mthuli Ncube (Columbus Mavhunga/VOA)

Uhulumende weZimbabwe uthi uzaqhubekela phambili esebenzisa imali yakwamanye amazwe, okugoqela idola leMelika elifunwa nguzulu.

Umphathintambo kahulumende obona ngokusetshenziswa kwelizwe, uMnu. Mthuli Ncube, lkanye losibalukhulu webhanga leReserve Bank of Zimbabwe, uMnu. Godwin Mangudya, bethule umbiko lo eHarare ngoMvulo besithi abanye abantu kabaselaqiniso lokuthi uhulumende uzaqhubeka esebenzisa imali le kumbe hatshi.

UNcube utshele intathalizindaba ukuba imali yakwamanye amazwe izasetshenziswa kuze kufike umnyaka ka2025.

Uthe lokhu kuhambelana lohlelo lweNational Development Strategy 1.

Lokhu kugcizelelwe nguMangudya othe abantu sebevunyelwa ukuthengisa impahla ngedola leMelika.

Uthi kumele benze lokhu belandela iziqondiso zomthetho wokusebenzisa imali yelizwe lemali yakwamanye amazwe kusetshenziswa umkambo wamabhanga.

UMangudya uthe bazajeziswa bonke abazatholakala besephula umthetho.

Ingcwethi kwezomnotho, uMnu. Masimba Kuchera, uthi eleZimbabwe libhekane lobunzima ngoba ngendlela isimo somnotho esimi ngayo idola leMelika yilo osokumele lisetshenziswe.

“Akula okunengi okuzaguquka lapha. Abantu bazaqhubeka besebunzimeni. Abantu abanengi bahola imali yakuleli. Nxa esithi sokusebenza ama US dollars kutsho ukuba intengo yempahla izakhuphuka.”

Eyinye ingcwethi, uNkosikazi Rejoice Mujimba, uthi akuqedakali okwenziwa nguNcube labanye bakhe.

“Ubunzima buzaqhubeka bukhona ngoba abantu loba bethenga ngemali yakuleli akuphathisi. Konke okuthengiswayo kubiza imali yeMelika.”

UNcube uphinde wathi uhulumende uzavuselela uhlelo lokwabela izisebenzi izindlu.

Uthe uhulumende kaMongameli Emmerson Mnangagwa uzama ngamandla wonke ukuba alungise okuhlupha izisebenzi, ezigoqela abezempilakahle abakhalala umsebenzi besithi befuna ukuhola idola leMelika.

Facebook Forum

XS
SM
MD
LG