Inkampani yezizalwane zeChina eyeAfrochine Smelting (Pvt) Ltd isiqanjwe njengenkampani eyephula amalungelo ezisebenzi ukwedlula amankampani wonke eZimbbawe.
Inhlolisiso eyenziwe ngabe International Trade Union Confederation (ITUC) iveza ukuba inkampani le kayilandeli imithetho yelizwe.
Ukucubungula okwenziwe ngabe ITUC kuveze ukuba inkampani le yehluleke ukubhadala izisebenzi iholo ngesikhathi njalo ixotshe abantu abangamatshumi amathathu lantathu- 33 ingazange ibazise.
Inhlanganiso ye International Trade Union Confederation ithi imizamo yokukhumisana umlotha eyenziwa ngabe National Employment Council kwehlula ukuguqula lokhu njengoba abameli balinkampani bengazanga emhlanganweni owenziwa mhlaka 22 Nkwenkwenzi 2021.
Ukucubunga lokhu kuveza njalo ukuba izisebenzi lezi zihlalela evalweni zisesaba ukuxotshwa umsebenzi lokutshaywa ngabakhulu balinkampani.
Imizamo yokukhuluma lezisebenzi lezi yehlule ngoba zisitshi ziyesaba ukukhuluma lentathelizindaba.
Inhlanganiso emele izisebenzi eyeZimbabwe Congress of Trade Unions (ZCTU) ithi akulanto emangalisayo ngoba inkampani zabantu abadabuka kwele China ziyahlukemeza abantu eZimbabwe.
Unobhala walihlanganiso uMnu. Japhet Moyo uchasisa ngalokhu.
“Angazake sithi thina amankampani ama China ikhona engcono kulezinye nxa sikhangela indaba yokubamba kubi izisebenzi. Sibona ukuba bayafanana abavela eChina.”
Uqhubeke esithi kumele uhulumende weZimbabwe akhangelisise lokhu ngoba uzulu weZimbabwe esiphila njengezigqili phansi kwesihluku sama China.
“Sibona nje ukuthi abantu babanjwa lucuku kuma investment awama China nxa sikhangela imibiko evela kumankampani eChina. Uhulumende kumele akukhangelisise lokhu.”
Kodwa abenkampani ye Afrochine bakuphikile lokhu besithi linkampani iphethe kuhle izisebenzi.
UMnu. Prosper Kufakunesu, isikhulumeli seAfrochine, uthe linkampani iphethe kuhle izisebenzi esithi iholisa ingxenye lehola ngedola leMelika.
“Sezizwile lokhu elikutshoyo. Sifuna ukutsho ukuba inkampani yethu ayikaze yehluleke ukubhadala izisebenzi. Ibhadala izisebenzi ngedola leMelika kungelani lobunzima obuselizweni.”
Imizamo yokuthola imibono kahulumende ngaloludaba yehlule ngoba umphathintambo kahulumende wezezisebenzi, uMnu. Paul Mavima, ubengaphenduli umakhalekhukhwini.
Kunyanga ezisanda kwedlula uMongameli Emmerson Mnangagwa wethule umbiko othi uhulumende uzimisele ukuvikela izisebenzi kumankampani wonke agoqela lawo asetshenzelwa ngabadabuka kwele China.
Imizamo yokuba kulungiswe udaba lolu kulinkampani iyehlula ngoba izisebenzi ezenza lokhu zihle zixotshwe khonapho, kutsho abenhlanganiso yeITUC.
Inkampani yeAfrochine ingaphansi kwenkampani enkulu yensimbi eyeTsingshan Holding, esebenza ku ondon Stock Exchange njenge Metals Exchange.
Iqhatshe abantu abayinkulungwane le ngxenye - 1,500.