amalinks wokungena

Breaking News

Abantu Abanengi Bathi Abasoze Benelise Ukubhadala Imali Yezifundo Zabantwana Ngemali Elingana Lamadola eMelika


Abantwana besikolo

Abantu abanengi bathi abasoze benelise ukuhlawula indleko zezikolo njengoba behola idola leZimbabwe hatshi eleMelika. Bethule lokhu ngesikhathi uhulumende esevumele izikolo ukuthi zibhadalise indleko enjenge tuition, imihloliso lokunye ngedola leZimbabwe elihambelama lesisindo sedola leMelika.

Isinqumo lesi sisolwa nguzulu othi abantu abanengi eZimbabwe bahola imali ephansi njalo engahambelani le dollar leMelika. UMnu. Thembakuye Moyo, isikhulumeli senhlanganiso yababalisi eyeAlmagameted Rural Teachers Union of Zimbabwe, uyakusola lokhu.

“Abadala sebebanjwa inkunzi uhulumende uyala uthi yena kala iUS dollar ukuthi anike izisebenzi zakhe kodwa ulifuna ngeganyavu ukuthi balisebenzise lekuhlawuleni imfundo yabantwana. Kuyavela obala ukuthi uhulumende imali yelizwe lakhe kasayifuni.”

UMnu. Effort Ncube, umqondisi wenhlanganiso yeConsumer Rights Association, uthi akuqedakali okwenziwa nguhulumende.

"Indlela eqondileyo yikuthi uqale ulinganise amaholo lemali yaseMelika ungakalinganisi ischool fees lemali yeMelika. Kumele kuqale lapho imali ezuzakala khona kungakabi lapho esiwa khona. Okwamanje kuyaveza kahle kamhlophe ukuthi kakayibambi kahle leyonto usalahleka kakhulu ngoba izisebenzi nxa zingazuzi imali elinganiswe ngemali yaseMelika kodwa besekuthiwa bakhiphe imali elingana leyeMelika.”

UNkosikazi Sanele Nyoni, isakhamuzi sakoBulawayo, uthi kuzakuba nzima ukuhlawula indleko zezikolo nxa iholo labo liyabe lingakhwezwanga.

“Okwenziwa nguhulumende nxa ethi uzama ukuvimba inflation ukwenza ngendlela engakhangeleli abantu phakathi. Khathesi kunje iholo limile ebantwini abanengi iUS dollar leli elikhulunywayo kunzima ukuthi silibambe lamarates abo ayabe etshintsha kokuphela, kunzima okokuthi ngabe kufakwa umthetho wokuthi noma ngaphi wonke umuntu sehola iUS kuhlanganiswa leRTGS bekuzabe kukhulumeka kodwa khathesi ifees ayibhadalwe ngendlela ebedibhadala ngayo kuze kulunge.”

UMnu. Taungana Ndoro, isikhulumeli sogatsha lwezemfundo, uthi izikolo sezivunyelwe ukwamukela imbadalo ngemali ykwamanye amazwe.

“Izikolo sezivunyelwe ukuthi imali zesikolo zibhadalwe ngedola leMelika lokhu kusitsho ukuthi abazali sebengabhadala ngendlela abafisa ngayo ukubhadala ezibunyelwe eZimbabwe.Lokhu kusitsho ukuthi abazali bayabe sebebhadala ngerate yakulelo langa, sizama njalo ukuthi silwisane lomkambo omyama ongenzakala ezikolo.”

Kukhangelelwe ukuba abanye abantwana bazakwehluleka ukuya ezikolo ngenxa yokukhuphuka kwenhlawulo yezifundo. Idola leZimbabwe okwamanje libiza amadola eMelika afika ZWL$365 emkambo wemali ophansi kuka hulumende weZimbabwe.

Facebook Forum

XS
SM
MD
LG