Amapholisa asebophe amalunga ebandla leCitizens Coalition for Change (CCC) amathathu abacatshangelwa ukuba bathumba ilunga lebandla elibusayo, uMnu. Nicholas Madzianike, ngoNhlangula.
Isikhulumeli samapholisa, uAssistant Commissioner Paul Nyathi, uthi ababotshiweyo bavalelwe enkambeni yamapholisa eChimanimani esabelweni seManicaland.
UNyathi uthi basahlolisisa ukubotshwa kwabantu abathathu laba ngakho-ke bazakwethulela uzulu okunengi kunsukwana ezilandelayo.
Iphephandaba leHerald libika ukuba ababotshiweyo nguChengetanai Musudu, Hakata Musudu loAaron Chizemo.
Kucatshangelwa ukuba bathumba uMadianike eChisedze Bar eBumba Business Center mhlaka 19 Nhlangula.
Kodwa umsekeli wesikhulumeli sebandla leCCC, uMnu. Ostallos Siziba, uthi akuqedakali okwenziwa ngamapholisa ababophe amalunga ebandla leli.
USiziba uthi amapholisa azama ukuvikela ibandla leZanu PF kulandela ukubulawa kuka Nkosikazi Moreblessing Ali, Langelihle Zonda Dube loAlphius Chinembiri ngabacashangelwa ukuba ngamalunga ebandla elibusayo.
Uthi sebethume amagqwetha ukuba ayehlolisisa okwenzakala eChimanimani.