WASHINGTON DC – UMongameli Emmerson Mnangagwa uthi uhulumende uzaphathisa ngemali yokubhadalela umngcwabo wesiphathamandla seMDC-T uMnu Giles Mutseyekwa.
Kumbiko awethule goMgqibelo, uMongameli Mnangagwa ududuze umndeni wakoMutseyekwa esithi labo kuhulumende lakuZanu PF bakhala ndawonye lawo.
Wengeze wathi ilizwe lilahlekelwe ngumuntu obeliziphethe kuhle njalo eqakathekisa ukusebenzelana lokuphumelela kwelizwe lanxa ubelilunga lebandla eliphikisayo.
UMutseyekwa, yena obhubhe kuliviki, ubengumsekeli kamgcinisihlalo weMDC-T ekhokhelwa nguMnu Douglas Mwonzora.
Waba ngomunye wabaphathintambo bogatsha lwendaba zasekhaya ngesikhathi sikahulumende wenkazatho owabunjwa yiZanu PF leMDC ngo2009.
