Osomabhizimusi labathengisa okutshiyeneyo emigwaqweni bathi alisathengi lutho idola leZimbabwe ngakho-ke sebesebenzisa idola leMelika kuphela ekuthengeni lekuthengiseni impahla.
Abakhulume lomsakazo weStudio 7 bathi baqale ukwenza lokhu ngeviki ephelileyo kulandela umbiko owethulwe ngusibalukhulu webhanga elikhulu lelizwe, uMnu. John Mangudya, othe uzulu usevunyelwa ukuthengisa impahla ngedola leMelika.
UMangudya uthe intengo yempahla kumele ihambelane lesisindo sedola elithengiswa emkambo wamabhanga eZimbabwe.
Abathengisa impahla bathi akusasebenzeki ngenxa yokugugudeka kwedola leZimbabwe. UNkosikazi Khesiwe Khumalo, othengisa impahla emigwaqweni ePumula koBulawayo, uthi abasalamukeli idola leZimbabwe.
UMnu. Rejoice Ngwenya, ingcwethi yenotho ezimeleyo, uthi seligugudeke okumangalisayo idola leZimbabwe okwenza ukuthi abantu bangasalemukeli abathengisa impahla.
UNgwenya uthi bekuvele kukhanya ukuba idola leZimbabwe lizaphela amandla lilahlwe nguzulu.
Lokhu kwenzakala ngomnyaka ka2009 kungena uhulumende womanyano. Idola leZimbabwe ngesikhathi leso laseligugudeke okokuthi lalingasathengi lutho.
Okwamanje idola elilodwa eleMelika libiza amadola angamakhulu ayisikhombisa (ZWL$700) akwele Zimbabwe. emkambo wensitho osebenza okwedlula owamabhanga.