amalinks wokungena

Breaking News

Usethwele Amagabha Avuzayo Umkhokheli Wakwele Bhilithani uBoris Johnson Okuthiwa Uhulumende Wakhe Ubolile


UBoris Johnson, umkhokheli wakwele Bhilithani
UBoris Johnson, umkhokheli wakwele Bhilithani

Sebemthwalise amagabha avuzayo umkhokheli wakwele Bhilithani, uMnu. Boris Johnson, okuthiwa uhulumende wakhe ugcwele ubukhohlakali.

Abezindaba abakunkampani yeAssociated Press babika ukuba umgciningcebo welizwe, uRicki Sunak, lophethe uhlangothi lukahulumende olubona ngezempilakahle, uSajid Javid, batshiye umsebenzi ngoLwesibili belandelana besithi abasenelisi ukusebenza loJohnson ngoba uhulumende wakhe kaqondakali ukuba wenzani.

USunak uthe kahambelani lenhlelo zika Johnson ezokusetshenziswa kwemali yelizwe njalo kasafunu ukusebenza kuhulumende wakhe kulandela imibiko ethi kunengi okubi okwenzakala kuhulumende wakhe.

Abaphikisa uhulumende kaJohnsom, abakubandla lezisebenzi eleLabor Party, bamtshele zagcwala edale leHouse of Commons besithi sesifikile isikhathi sokuthi atshiye umsebenzi. Bamkhumbuze ngedili elikhulu alenza labanye bakhe ngesikhathi ilizwe lilwisana lomkhuhlane weCOVID-19, ubutshapha obenziwa ngabanye abakuhulumende lokunye.

Abanye njalo abane abakuhulumende wakhe batshiye umsebenzi ngoLwesithathu besithi abasenelisi ukusebenza loJohnson, okubikwa ukuba wafihla izenzo ezimbi zika Chris Pincher, okade sekhokhela ibandla lama Conservatives engakatshiyi umsebenzi.

UPincher kubikwa ukuba wabambabamba amadoda amabili endaweni yokunatha utshwala kwabikelwa uJohnson, owakhangela eceleni esithi udaba lolu luzedlula.

Kulendaba ezinengi esezivumbululwe ngabantu ezikhomba ukuba uPincher ulakho ukuba ulihlongandlebe.

Ibandla lika Johnson lilesikhatshana lizame ukumsusa esikhundleni lama kancane lisenzela ukuba aguqule izenzo. Kukhanya sokwehlule ukuba abuse loba esithi kayindawo.

Kuhangelelwe ukuba ulakho ukususwa esikhundleni ngeviki ezayo engamfulathela amalunga ebandla lakhe.

XS
SM
MD
LG