Umkhokheli wakwele Bhilithani, uMnu. Boris Johnson, ukhangelelwe ukuba uzatshiya umsebenzi namuhla kulandela ukwehluleka kwakhe ukuqhuba imisebenzi kahulumende ngenxa yobukhohlakali lokunye.
Abezindaba abeReuters babika ukuba uJohnson usetshelwe ngabanye bakhe abakubandla leConservative Party ukuba atshiye umsebenzi. Kodwa kubikwa ukuba uthi ufisa ukubamba isikhundla somkhokheli wakwele Bhilithani okwesikhatshana ukuze uhulumende asebenze ngemfanelo.
Kodwa abakubandla lakhe bathi sokumele asuke esikhundleni ngokutshetsha ngoba uhulumende wakhe wehluleka ukunakekela uzulu ngesikhathi abantu bebhekane lohlupho lokukhuphuka kwentengo yamafutha ezimota, umkhuhlane weCOVID-19 lokunye.
UJohnson uthethiswe izolo ngabakubandla leLabor Party abamtshele ukuba kumele asuke esikhundleni kulandela imibiko ethi wenza igigi elikhulu abantu bonke kwele Bhilithani bevalelwe ezindlini ngesikhathi kumemetheka ngamandla igciwane leCOVID-19 njalo wafihlela uzulu okwenziwa ngomunye wakhe owabambabamba abesilisa endaweni yokunatha utshwala.
UJohnson waphika ukuba uChris Pincher wenza lokhu kodwa wacina evuma esithi wayesekhohliwe ukuba watshelwa ngodaba lolu. UPincher ubekhokhela ibandla elibusayo kudale leHouse of Commons.
Lokhu kwenze umgciningcebo kahulumende, uMnu. Rishi Sunak, lophethe uhlangothi lwezempilakahle, uMnu. Sajid Javid, labanye abafika amatshumi amahlanu lanhlanu – 55 betshiye umsebenzi.
UJohnson kubikwa ukuba ulokhu esewofisini yomkhokheli welizwe lapho adinga khona abangangena ezikhundleni zabatshiye umsebenzi.
Ufisa ukuba ahlale esikhundleni lesi kuze kuyefika uMfumfu loba abakubandla lakhe besithi kumele asuke ngokutshetsha.
Bamelele abantu kwele Bhilithani ukuzwa ukuba uzakwenzani kuyiwa phambili.