amalinks wokungena

Breaking News

ZPP: Sebethwele Nzima Abaphikisayo eZimbabwe Abakhahlanyezwa Ngamalunga Ebandla leZanu PF Leziphathamandla Zikahulumende


Bathwele nzima abaphikisayo kwele Zimbabwe.

Inhlanganiso ebona ngokwenzakala kwezombusazwe langelungelo loluntu eZimbabwe ithi banengi abantu abakhahlanyezwa ngamalunga ebandla elibusayo labanye abakunhlangothi zikahulumende.

IZimbabwe Peace Project (ZPP) yethule umbiko lo namuhla isithi abakhahlanyezwa kakhulu bakubandla leCitizens Coalition for Change elikhokhelwa nguMnu. Nelson Chamisa.

IZPP ithi ayancipha amathuba okuphatheka kwezombusazwe eMashonaland West, Mashonaland East, Mashonaland Central leMasvingo lapho asebethwele nzima abakubandla leCCC.

Inhlanganiso le ithi abanye abatshotshozela udlakela bagoqela umphathintambo wendaba zekhaya, uMnu. Kazembe Kazembe labanye abalezikhundla eziphezulu kubandla elibusayo.

IZPP ithi uMongameli Emmerson Mnangagwa lomsekeli wakhe, uMnu. Constantino Chiwenga, lowayengumsekeli kamongameli uMnu. Kembo Mohadi labo bakhuthaza izinduna labosobhuku ukuba besekele ibandla elibusayo.

Konke lokhu kwenzakala ngesikhathi ilizwe lilungiselela ukhetho oluzakwenziwa ngomnyaka ozayo. UMnu. Joseph Tshuma, okudale leCentral Committee ubandla leZanu PF, uthi akuqondanga ukuba abantu balwe ngesikhathi sokhetho.

UMnu. Ostallos Siziba, okubandla leCCC, laye uthi udlakela alufunakali.

Lokhu kusekelwa nguMnu. Janana Ngwenya, owancintisa kukhetho lwama by-elections koBulawayo, othi kugcwele abantu abafisa ukungena ezikhundleni ngodlame.

Asenelisanga ukuxoxa ngodaba lolu loKazembe, uMohadi labanye okuthiwa baphehla udlakela eZimbabwe. Abantu abanengi besaba ukuba kuzaqhamuka udlakela olwesabekayo ngesikhathi sokhethi ngenxa yokuthi ibandla leZanu PF lesabe ukuthi lingenqotshwa ngelikhokhelwa nguChamisa.

Facebook Forum

XS
SM
MD
LG