amalinks wokungena

Breaking News

Sokuqhamuke Umkhuhlane Wohudo koBulawayo


FILE: Unatha amanzi alesawudo letshukela ngesikhathi kuqhamuke umkhuhlane wohudo eZimbabwe. (C. Mavhunga/VOA)

Sekuqhamuke umkhuhlane wesihudo elokitshini lePumula North koBulawayo lapho izakhamizi ezedlula ikhulu ziphathekile kakhuli bacine besiyakwelatshwa ekilinika yePumula kuthi umntwana oyedwa ulalisiwe esibhedlela seMpilo Central Hospital.

Amanzi azavalelwa izakhamizi kusukela lamuhle kuze kuyefika Mhlaka 21 kuyonale inyanga. lzakhamizi zakoBulawayo zihlalele evalweni kulandela ukuqhamuka kwesihudo elokitshini lePumula North.

Isikhulumi sikamaninsimpala wakoBulawayo, uNkosikazi Nesisa Mpofu, uthi banengi asebethaphe umkhuhlane lo ePumula.

UNkosikazi Mpofu uqhubekele phambili ekhuthaza uzulu ukuba abilise amanzi engakawanathi

Isakhamuzi sePumula North, uNkosikazi Flora Ncube, uthi ubehlaselwe yisohudo

UBulawayo usevame ukuhlaselwa yisihudo osekutshiye inengi lezakhamizi zikhathazekile. Amalokitshi abalisa iLuveve leTshabalala lamanye sekuke kwabalabantu abahlaselwa yisohudo abanye balahlekelwa ngumphefulo kulandela ukunatha amanzi angahlanzekanga.

Kusenjalo, kungakhathalekile lokuqhamuka kwesihudo ikhansili iqale lamuhla ukugavunela uzulu amanzi okwamahola angamatshumi amane lasigicaminwemibili - 48 hours kulandela ukudubuka kwempompi ethwala amanzi eNcema Esigodini.

Isakhamuzi sakoBulawayo esihlala eLuveve, uMnu. Melusi Moyo, uthi bavuke bengal amanzi njalo bengelambiko abaqutholileyo ngokuhamba kwamanzi.

Olwela amalungelo oluntu, uMnu. Effie Ncube, uthi impilo yezakhamizi zakoBulawayo isihlala isengozini ngokuhlala amanzi evaliwe okulakho ukudala imikhuhlane etshiyeneyo

Umaninspala wakoBulawayo ubhekane lodubo lokusilela kwamanzi kanye lempompi ezindala ezithwala amanzi ahlanzekileyo langcolileyo okucina kubangela ukudubuka kwempompi ezindala. Uhulumende uncedisana leKhansili yakoBulawayo ukutholisa amanzi ahlanzekileyo ngokufaka impompi ezintsha ezithwala amanzi ahlanzekileyo langcolileyo okubiza amatshumi amathathu lasificaminwe mibili ezigidi zamadola eMelika etholiswa libhanga leAfrican Development Bank kuyisikwelede.

Facebook Forum

XS
SM
MD
LG