amalinks wokungena

Breaking News

Abantu Sebelungiselela Ukufola Emigwaqweni eZimbabwe Bekhonona Ngeholo Eliphansi Langokwephulwa Kwelungelo Loluntu Nguhulumende


Amapholisa abegcwele ngoMvulo emigwaqweni eHarare.
Amapholisa abegcwele ngoMvulo emigwaqweni eHarare.

Abamele inhlanganiso ezizimeleyo lezisebenzi bathi balungiselela ukufola emigwaqweni bekhonona ngeholo eliphansi lokwephulwe kwelungelo loluntu nguhulumende kaMongameli Emmerson Mnangagwa.

UMnu. Peter Mutasa, okhokhela inhlanganiso yeCrisis in Zimbabwe Coalition, uthi kukhangelelwe ukuba izisebenzi ezitshiyeneyo labantu abafisayo, bazangena emigwaqweni bengakhulumisana lamapholisa kunsukwana ezilandelayo.

UMutasa uthi abantu eZimbabwe bathwele nzima ngenxa yokugugudeka komnotho, okwenza kubenzima ukuthi bethenge impahla etshiyeneyo esithengiswa ngedola leMelika.

Uthi izisebenzi ezinengi zihola idola leZimbabwe eselingumquba.

UMutasa uthi bazafola emigwaqweni loba bengaphiwanga imvumo ngamapholisa abegcwele eHarare ngoMvulo emelele abatshengisela bekhonona ngokubahluphayo.

Lokhu kugcizelelwe nguMnu. David Dzatsunga, unobhala jikelele wenhlanganiso yezisebenzi zikahulumende eyeZimbabwe Confederation of Public Sector Trade Unions.

Uthi seliphansi kakhulu iholo lezisebenza okwenza zehluleke ukuphandela imuli zabo ukudla.

Isisebenzi esihola imali ephansi kuhulumende sithola amadola eMelika afika amatshumi amahlanu njalo leCOVID allowance edlula ikhulu lamatshumi ayisikhombisa – US$175 ngenyanga.

Izisebenzi zifisa ukuhola phose inkulungwane zamadola eMelika – US$840 ngenyanga.

UMnu. Paul Mavhima, umphathintambo wohlangothi lukahulumende olubona ngezisebenzi, uthi akulasizatho esokuthi izisebenzi zifole emigwaqweni.

UMavhima uthi izisebenzi kumele ziqhubekela phambili zixoxisana lezithunywa zikahulumende kumanyano weNational Tripatite Joint Negotiationg Forum.

Izisebenzi zanika uhulumende isikhatshana sokuthi alungise iholo labo.

UAssistaant Commissioner Paul Nyathi, sikhulumeli samaphomisa, uthi kumele bonke abafisa ukufola emigwaqweni belandele imithetho yelizwe.

UNyathi uthi amapholisa abegcwele emigwaqweni eHarare ngoMvulo esenzela ukuvikela uzulu.

XS
SM
MD
LG