Abantu behlukene ngemibono phezu kwempumela yokubalwa kwabantu eveza ukuthi idolobho lakoBulawayo yilo elilabantu abalutshwana ukwedlula izigaba zonke elizweni.
Amanani la aveza njalo ukuthi izigaba zontathu zeMatebelaland, ezigoqela yona iBulawayo, iMatabeleland South leMatabeleland North yizo ezihambela emuva ngamanani abahlali.
Lusethula impumela ye-national census eqhutshwe kunyanga ezedluleyo izolo, ugatsha lweZimStats luveze ukuthi inani labantu beZimbabwe likhwele lisuka phezu kancane kwezigidi ezilitshumi lantathu, 13,061,239 ngomnyaka ka2012 lafika ku15,178,979 lonyaka.
Idolobho leHarare yilo elilabantu abanengi abayi2,4 million, lilandelwa yiManicaland, yona elabantu abangu 2 million.
Idolobho lakoBulawayo yilo elilabantu abalutshwana elizweni lonke, abangu 665,940 lilandelwa yiMatabeleland South elabantu abangu 760, 345.
IMatabeleland North yona ihleli kuzinga lesithathu kusukela emsileni ngabantu abangu827,626. Abanye bathi kuyabamangalisa ukuthi kungani amanani akoBulawayo ephansi khona kukhanya kulabantu abanengi.
Sixoxe lesiphathamandla senhlanganiso yeBulawayo Progressive Residents Association uMnu Thembelani Dube.
Abanye bathi abantu babaleka ngobunengi ngesikhathi seGukurahundi.
Siphinde saxoxa lengcwethi ecubungula ezombusazwe, uMnu. Methuseli Moyo.