WASHINGTON DC - Umholi webandla leCCC uMnu Nelson Chamisa uthi idola leZimbabwe kumele libekwe eceleni kusetshenziswe eleMelika ngokugcweleyo ukuze kube lobubelo kwezenotho.
Eloba enkundleni yeTwitter ngoLwesithathu, uChamisa uthe ukukhwela kwe-inflation isiya ku257 percent kuveza sobala ukuthi uhulumende uyehluleka ukuphatha kuhle umnotho.
Uthe kumele izisebenzi zikahulumende zibhadlalwe imali esukela kuUS$540 kusiya phezulu, kuphinde kuguqulwe okunengi okuphathelane lomnotho ukuze kumiswe ukukhwela mahlayana kwentengo yezinto.
Wengeze wathi ezombusazwe lezokhetho lazo kumele ziguqulwe ukuze kungabi lokudonselana kukhetho luka2023.
Umsekeli wesikhulumeli seCCC uMnu Gift Ostalos Siziba ugcizelele amazwi kaChamisa, wakhuthaza njalo abantu kukuthi bayevota ngobunengi kukhetho oluzayo.
Kodwa ilunga leZanu PF uMnu Joseph Tshuma uthi uChamisa labanye bakhe yibo ababangela ukudilika komnotho ngokucela izijeziso zenotho.