amalinks wokungena

Breaking News

Kugwazwa uSalman Rushdie Owaloba Ugwalo Oluthi The Satanic Verses


USalman Rushdie ugwazwe ngumuntu ngoLwesihlanu eNew York kwele Melika. Waloba ugwalo okuthi The Satanic Verses.

USalman Rushdie, owaloba ugwalo olwazondisa abohlobo lweSiMoslem, ugwazwe ngumuntu ngoLwesihlanu esezakwethula imfundiso eqakathekileyo eNew York.

URushdie, owaloba ugwalo oluthi The Satanic Verses ngama 1980s, ugwazwe kanenginengi entanyeni ngumuntu obanjwe ngamapholisa bamhambisa enkambeni lapho abuzwa khona okwamanje ngenjengo yakhe yokuhlasela umlobi lo.

UMnu. Andrew Wylie, umphathi wenhlelo zonke zomlobi lo, uthi okwamanje uRushdie usesibhedlela lapho aphethwe khona ngabahlinza imizimba okusemthethweni bezama ukupholisa izinhlungu zikazulu.

Abezindaba abeAssociated Press babika ukuba akwaziwa ukuthi uzwanjani emzimbeni uRushdie, okukhanya engani ulimele kakhulu kusehlakalo lesi.

Udokotela omhlolileyo uMartin Haskell uthi uRushdie, olimele kakhulu, ulakho ukuphepha kusehlakalo lesi.

Omunye olimele kusehlakalo lesi, uHenry Reese, obekumele akhulume ngokubhekane labalobi abacatshe kwele Melika, laye ulimele.

Bekulabantu abafika inlulungwane lamakhulu amahlanu - 2,500 akade befisa ukubona uRushdie esethula akucabanga ngokubhekane labalobi abahlala kwele Melika ababaleka emazweni abo besethuselwa nguhulumende labadlelana laye.

Kulemali efika izigidi ezintathu – US$3 million eyethulelwa lowo ozabulala uRushdie.

EleIran lazondiswa yikuloba kwakhe okwakuthiwa kuthethisa uMpolofita uMohammed.

URushdie waloba ugwalo oluthi The Satanic Verses ngomnyaka ka1988. Abokholo lweSiMoslem bacaphuka okumangalisayo ngogwalo lolu batshengisela emigwaqweni emazweni atshiyeneyo.

Kwafa abantu abangamatshumi amane lanhlanu – 45, abagoqela abalitshumi lambili ababulawa lapho uRushdie azalwa khona kwele India.

Owaloba ugwalo luka Rushdie ngolimi lwabadabuka kwele Japan wabulawa kwathi omunye njalo owakwele Italy owenza okufanayo laye wagwazwa. Umqondisi wenkampani eyadinda ugwalo luka Rushdie wadutshulwa kathathu, wasila.

Umkhokheli wakwele Iran, uGrand Ayatollah Ruhollah Khomeini wethula umbiko ngomnyaka ka1989 othi kumele uRushdie abulawe. UKhomeini wabhubha ngomnyaka lowo.

Umkhokheli wakwele Iran, uAyatollah Ali Khamenei, wethula umbiko othi akumelanga abantu bezihluphe ngokubulala uRushdie.

URushdie wethula olunye ugwalondaba olwalulesihloko esithi Joseph Anton. Wayesebenzisa igama leli ecatshele ukubulawa kulandela ukuloba kwakhe ugwalo olwacaphula abokholo lweSiMoslem.

Wake wathola isicoco esiphezulu sokuloba eseBooker Prize kulandela ukuloba kwakhe ugwalo lwabantwana oluthi Midnight Children.

Wathola isicoco esinye njalo asiphiwa yiNdlovukazi yakwele Bhilithani, uQueen Elizabeth II, ngomnyaka ka2008.

Ugwazwe esendaweni ebizwa ngokuthi yiThe Chautauqua Institution eduzane ledolobho leBuffalo esabelweni seNew York.

Le yindawo lapho abantu abahamba khona besiyakwethula okubasindawo emakhanda lenhlizweni.

Abadinga imali yokuthi kubulawe uRushdie abahlala kwele Iran abakaphenduli imibuzo ethunyezwe ngabezindaba abeAssociated Press.

Facebook Forum

XS
SM
MD
LG