Washington DC.....................
Umkhuhlane wendingindi oqhamuke ngoMabasa, lonyaka, esigabeni seManicaland, eZimbabwe, ubikwa usubulele abantwana abafika amatshumi ayisitshiyangalombili, abangamakhulu amathathu balaliswa yiwo phansi.
Uhulumende usola ukumemetheka komkhuhlane wendingindi lokhu kwabenkolo yesipostoli eManicaland, esithi kabahlabisi abantwababo ukubavikela emikhuhlaneni, njalo kabelaphisi labo abayabe begula. Amanye amadolobho aseZimbabwe asehlezi ezilungiselela ukuthi nxa umkhuhlane wendingindi ungafika kwezabo izigaba, batholakale bewulungiselele.
KoBulawayo, umqondisi wezempilakahle kukhansili yaleli dolobho uMnu. Charles Malaba uthe sebelungele ukumelana lokumetheka okungabakhona komkhuhlane wendingindi ngokuthatha amanyathelo athile.
“KoBulawayo okwakhathesi besingakatholi ama cases endingindi, but siyazi ukuthi indingindi isiqhamukile elizweni…but koBulawayo besingaka tholi ama cases. Okukuqala, ngingathi vele as iHealth Department, sihlezi siyimelele, si alert, silemzamo ngoba siyazi ukuthi imkhuhlane ingaqhamuka anytime. So silama programs ayabe ecover khonokho ukuthi nxa umkhuhlane ungaqhamuka, usithole silungiselele.”
UMalaba ubuye wengezelela ekhuluma ngabenkolo abangahlabisiyo abantwana babo, “Siyazama sibili ukuthi sibakhuthaze labo, especially angithi bakhona abantu abamachurch amanye abathi abantwana babo akumelanga bahlatshwe. Kodwa siyazama ukubabonisa ukuthi uhlupho olukhona yikuthi sizama ukuvikela abantwana. Kasitsho ukuthi bephambaniseke ekholweni lwabo, kodwa impilo zabantwana ziqakathekile, njalo bananzelele ukuthi, nxa abantwababo sebethe babalomkhuhlane, ucina usungena kulabo abanye bantwanta angaso part yechurch yabo.”
Ucine ngokuxwayisa izakhamizi ngokuqakatheka kokuhlanzeka ukuthi bavikeleke kweminye imikhuhlane, ikakhulu owesihudo, ngenxa yokuswelakala kwamanzi kulelidolobho kulezinsuku.