amalinks wokungena

Breaking News

Uhulumende Uthi Uzakwengeza Iholo Lezisebenzi Zakhe


Zimbabwe Government

Izisebenzi zikahulumende zithi lanxa zisamukela isaziso sikahulumende sokwengeza ingxenye yeholo lazo elibhadalwa ngedola leMelika zona zithi ngabe lonke iholo lankona lihle libhadalwe ngumqatshi ngedola leMelika hatshi ukuhlanganisa leleZimbabwe elingasasebenzi endaweni ezinengi zelizwe

Washington DC.............

Uhulumende uthi usekhangelisisa ukukhuphula isigaba seholo lezisebenzi zakhe esibhadalwa ngedola leMelika kanye laleso sigaba esibhadalwa ngedollar leZimbabwe. Lokhu kubikwe ngumnunzana Mthuli Ncube umphathintambo wezemali. lzisebenzi zona lokhu ziqina ngelokuthi zifuna iholo lazo lonke libe lidola leMelika ngoba indleko yonke yempilo isihlawulelwa ngaleli dola.

Izisebenzi zikahulumende zithi lanxa zisamukela isaziso sikahulumende sokwengeza ingxenye yeholo lazo elibhadalwa ngedola leMelika zona zithi ngabe lonke iholo lankona lihle libhadalwe ngumqatshi ngedola leMelika hatshi ukuhlanganisa leleZimbabwe elingasasebenzi endaweni ezinengi zelizwe, ezitolo lakwezinye indleko zempilo.

Umnunzana Anthony Majongosi isikhulumeli senhlanganiso yabongi eyeZimbabwe Nurses Association esibhedlela se UBH uthi bafisa ukuthi iholo lonke baliphiwe ngedola leMelika.

“Ngibone iGovernment ithi izozama ukusifakela amadola eAmerica. Sizabonga engasifakela amaUSDollar. Siyakubongela lokhuyana. But, sizwe isithi izofaka eyinye imali amaRTGS enye ibe ngamaUSDollar. Kodwa Thina siyaqhubekela phambili sisithi imali yonke leyana ibe ngama USD, yikho ukuthi sikwanise ukuthi siphile kuhle.”

Umnunzana Lindinkosi Maqhathelana wenhlanganiso yababalisi eyeZimbabwe Teachers Association uthi kulicebo elihle kodwa kumele kube lesiqiniseko sokuthi ngokwesikhathi eside.

"Abantu abanengi bazakwamukela nxa kuyikuthi ingezelelwa ngeUS kungenxa yokuthi into ezinengi esesizithenga sezithengwa ngeUS dollar.Engingabe sengikwesabela yikuthi uhulumende engabe kambe elayo imali kumbe uyenelisa iUS dollar salary leyo ikakhulu considering inhloso yabo ibingeyokuthi bebuthelele izimali bebekwazi ukuthi imali yokusiholisa ikhona isikhathi eside.”

Umnumzana Thembakuye Moyo yisikhulumeli seyinye njalo inhlanganiso yababalisi, eye Amalgamated Rural Teachers Union of Zimbabwe (ARTUZ). Yenake upha umbono wakhe ngaleli nyathelo elifuna ukuthathwa nguhulumende.

“Umbiko uMthuli loMavima abasinikeza wona njengabameli bezisebenzi ukuthi bazakhuphula imali yeUSDollar ngoSeptember babuye bakhangele behlaziya leyi eyeRTGS, isitshengisa ukuthi uhulumende usaselomango omude phakathi kwakhe lezisebenzi. Besicabanga ukuthi umhlangano lowu ngowokusisondeza eduzane phakathi kwezisebenzi loHulumende. Pho uHulumende kafuni ukukubona ukuba izisebenzi azenelisi ukuphila.”

Umpathintambo wezemali uMnu. Mthuli Ncube kanye lowezisebenzi zikahulumende, uMnumzana Larry Mavima batshele abameli bezisebenzi emhlanganweni oqutshwe ngeviki edluleyo ukuthi basahlolisisa umcabango wokukhuphula iholo lazo ngenyanga kaMpandula kanye lokwengesa isigaba seholo elihlaulwa ngamaRTGS.

Uhulumende uthi uyaqakathekisa impilakahle yezisebenzi zakhe kodwa inkinga isuka ibe ekuthini akenelisi ukuthola idola leMelika elenela ukuholisa izisebenzi zakhe. Uthi kodwa uzakhuphula isilinganiso semali yamaRTG’s kusiya ngokuthi uthole malini engenayo esikhwameni sakhe.

Izisebenzi zikaHulumende zamukele lumbiko ngemibono ehlukileyo abanye besithi leli linyathela elingela qiniso ngoba vele lale imali efakwayo ilidola leMelika ingela bizo okungenzeka ukuthi ivuke ikhitshwe loba nini. Kunje zihlala zisethusela ukukhalala umsebenzi ngoba iholo lazo lingahambelani lentengo esezitolo layo yonke indleko yempilo.

please wait

No media source currently available

0:00 0:04:41 0:00

Facebook Forum

XS
SM
MD
LG