amalinks wokungena

Breaking News

Kuvulwa Okusemthethweni Inkampani yeCold Storage Commission koBulawayo


Some of the slaughtered beasts at the CSC facility in Bulawayo.
Some of the slaughtered beasts at the CSC facility in Bulawayo.

Umsekeli kamongameli, uMnu. Constantino Chiwenga ngoLwesine uvule okusemthethweni inkampani yeCold Storage Commission Boustead Beef Zimbabwe koBulawayo.

I-CSC, ebambisana lenkampani yekwele Bhilithani. yalobelana isivumelwano lohulumende sokuvuselela inkampani le.

UChiwenga uthi lokhu kuzathuthukisa umnotho weZimbabwe.

Isisebenzi sihlinza inkomo ngesikhathi kuvulwa okusemthethweni inkampani yeCold Storage Company koBulawayo.
Isisebenzi sihlinza inkomo ngesikhathi kuvulwa okusemthethweni inkampani yeCold Storage Company koBulawayo.

UChiwenga ubhode ebuka imitshina emitsha yokuhlinza inkomo yakulezi nsuku eyeCSC koBulawayo eyalethwa ngabenkampani eyeBoustead Beef yaseBhilithane ngaphimbilini kokwethula umbiko wakhe kusehlakalo sokuvuselelwa okusemthethweni komsebenzi wale inkampani.

UChiwenga utshele umbuthano wokuvula linkampani ukuthi eleZimbabwe selizathengiselana inyama lamazwe aphetsheya.

"Izabakhona kuze kube nini lanini, ayisoze ibhidlike njengalokhu okwenzqkala kuqala emehlweni ethu isifa sikhangele. Lokhu kuzenza isigaba lesi sithuthuke kubelemisebenzi. Namuhla ngijabulile kakhulu ukuba lani ngosuku lwanamhlanje oluqakatheke kakhulu sivula kakutsha iBoustead Beef Cold Storage Company Plant.”

Umphathintambo wedolobho lakoBulawayo, uNkosikazi Judith Ncube, wamukele ngenjabulo lumsebenzi esithi lokhu kuveza ukuba uhulumende wakhe uyagcwalisa izithembiso zokuletha intuthuko kuleli dolobho.

UMnu. Constantino Chiwenga labaqondisi benkampani yeCold Storage Company.
UMnu. Constantino Chiwenga labaqondisi benkampani yeCold Storage Company.

"Ngemva kokuthi uhulumende sezuze i-invester eyokuzama ukuthi sivuse ama parastatals ethu kumbe izakhiwo zethu, ama-opportunities emsebenzi aselokhe ecwayiza, ecwayiza evuleka kancane kancane. Engikufisayo yikuthi sibelokubekezela kancane sisenzela ukuthi siphusheni sonkeni."

Ikampani yeBoustead Beef yiyo efake imali yonke yokuvuselela izilaha lezi zenkomo. Isizalwane seBhilithane, uMnu. Nick Havercroft, ngumnikazi walinkampani.

Isisebenzi sitshengisa uMnu. Constantino Chiwenga labanye indlela oluhlinzwa ngayo inkomo eCold Storage Company koBulawayo
Isisebenzi sitshengisa uMnu. Constantino Chiwenga labanye indlela oluhlinzwa ngayo inkomo eCold Storage Company koBulawayo

"Ekutshintsweni kukaHulumende kaMugabe saqalisa ukukhulumisana lohulumende omutsha ukuthi singabuya sizovuselela izakhiwo zokubulalela inkomo ilizwe lonke njalo lokhu ngokwethu sodwa ngoba sivumelane lohulumende ukuthi sithathe lezindawo sisebenze okweminyaka emgamatshumi amabili lanhlanu. Thina siyikampani ezimeleyo yodwa njalo yithi esifake imali.”

Ezinye izisebenzi ezazisebenza eCSC ingakavalwa seziqhatshwe kulikampani entsha. Omunye wabo nguMnu. Tendayi Giga.

"Ngisebenze lapha eCold Storage okwemnyaka engu15 so ngijabulile ukuthi iCold Storage isizavula, abafana sibatshiye sibafundise umsebenzi. Sengibiziwe ukuthi ngiphenduke la. Lapha sikhangelele ukuthi ingasafi ngoba thina sasisebenza nzima singatholi anything okweminyaka eminengi. Ngeminyaka le esilayo sesikhulile sesinje sifuna ukutshiya lathi sisebenze ama 2, 3 years sitshiye sifundise abafana ukuthi iCompany ibanjwa njani."

UMnu Ishamael Ncube laye ngomunye wababizwe ukuthi bazoncedisa.

"Mina ngithabile ukuthi sesiyavula. Let's hope kusiya ngokuya kwesikhathi izinto zizathuthuka at least lathi impilo zethu zitshintshe. In the mean time bake bangibiza last week ukuthi ngizabuya ngizobancedisa here and there ku-refregiration ukuthi asebenzenze kuhle."

Ukugugudeka kwezomntho lenkohlakalo kukampani yeCold Storage Commission kwenza likampani ifadalale yacina ivalwa emnyakeni emgamatshumi amabili lambili edluleyo. Okwamanje ikampani yeBoustead Beef ithi izavula ezinye ingatsha zayo eMasvingo, Chinhoyi leMarondera kungakudala.

XS
SM
MD
LG