amalinks wokungena

Breaking News

Sokuqhamuke Umkhuhlane Wendingindi koBulawayo Osubulele Abantwana Afika 157 eZimbabwe


FILE - Abazali bafole lapho okuhlatshwa khona ijekiseni yokuvimba ukumemetheka kweningindi.

Umkhuhlane wendingindi oqhamuke ngoMabasa eManicaland usukhona lakoBulawayo osubanjwe ebantwini abahlanu.

lkhansili yaleli dolobho ibika ukuthi umkhuhlane wesihudo lawo usuhlasela ngolaka, usubanjwe abantwini abangamatshumi ayisithupha lantathu- 63.

Umkhuhlane wendingindi usubulele abantwana abedlula ikhulu lengxenye (157) abangahlatshwanga ijekiseni yokuvikela umkhuhlane lo.

Lokhu kwethulwe ngumphathintambo wezokhitshwa kwemibiko, uNkosikazi Monica Mutsvangwa.

Embikweni wakhe uphinde wathi kulabantu abazinkulungwane ezimbili asebetholakele belawo, ngakhoke uhulumende usesungule uhlelo lokuhlaba abantwana ijekiseni lokuzivikela ukuze kwehliswe amathuba okubulawa yiwo.

UMnu. Gift Ndlela, umongi esibhedlela sakoBulawayo, uchasisa ukuthi indingindi ngukhuhlane othelelwana njani ebantwaneni.

“Indingindi ngumkhuhlane otholakala ebantwaneni abancane uthelelwana ngokuthi umtwana engathinta endaweni okubambe omunye obelomkhuhlane lowu nxa bedlala lokuthintana imzimba lamathe. Umkhuhlane lo ulakho ukuvikeleka ngokuthi ehlatshwe ama vaccine, ama vaccine lawa ayasiza ukuthi umuntu engatholi igcikwane lendingindi yona ibonakala ngemva kwamalanga alitshumi.”

UNkosikazi Ntombizodwa Ndiweni, umzali oselokitshini leNkulumane, uthi uhulumende uyaphuza ukuletha imithi yamajekiseni okuzivikela emtholampilo lezibhedlela.

“Siyananzelela njengabomama ukuthi imikhuhlane eminengi ebantwaneni ibalesikhathi efika ngaso, njalo abezempilakahle bayabe sebekwazi nxa usuqhamukile kodwa okusidanisayo yikuthi imithi yokuvikela iyaphuza ukutholakala kuyabe kulokhe kuthiwa ubuye uzokhangela kuze kucine sekulate umkhuhlane usumemethekile okuyikho esifisa ukuthi kulungisiswe masinyane Kubuhlungu ukulahlekelwa ngumtwana ngento ebingalungiswa.”

UDokotela Mthabisi Bhebhe wakoBulawayo uthi ingozi enkulu idalwa ngabazali abalenkolo ezibalela ukuhlabisa abantwana amajekiseni okuzivikela.

“Kuqakathekile ukuthi abantwana nxa bezalwa bathole ama vaccine ngesikhathi esifaneleyo, idelela abantwana abangavaccine. Umtwana wonke ongavaccinate abone udokotela ukuthi ethole ivaccine ngesikhathi esifaneleyo. EZimbabwe abantwana abanengi abale measles ngabamaChurch akhuthaza omama ukuthi benga vaccinate abantwana nxa bezalwa, okuqakathekileyo yikuthi amaChurch anjalo kumele afundiswe ekuvikeleni emkhuhlaneni.”

Kusenjalo, koBulawayo sekuqhamuke njalo umkhuhlane wesihudo.

UNkosikazi Wendy Mdlongwa, umhlali wakoBulawayo, uthi kakulungiswe udaba lokusilela kwamanzi kuqala.

“Umkhuhlane we-diarrhea osuqhamuke koBulawayo kungenxa yokusilela kwamanzi. Okubuhlungu yikuthi ikhansili ayilandeli i time-table abayifakayo eyokuvalwa lokuvulwa kwamanzi. Ngibona nxa kungalungiswa udaba lwamanzi kungenqabelwa lokhu.”

Imizamo yokuxhumana lekhansili yakoBulawayo mayelana lokumemetheka komkhuhlane lo yehlule kodwa umnumzana Charles Malaba owenqabe ukuthatshwa ilizwi wazise iStudio 7 ukuthi amanani akhitshwe yikhansili kuphetha usuku lwayizolo atshengise ukuba kucatshangelwa ukuba kulabantu abahlanu abangabe belendingindi, bekusahlolisiswa ukuba balawo loba hatshi.

Kumbiko owethulwe lugatsha lwezempilakahle, unobhala wogatsha lolu uDokotela Jasper Chimedza wazise ukuthi umkhuhlane wendingindi oqhamuke esabelweni seManicaland ngenyanga kaMabasa usumemetheke ilizwe lonke, ethi uhlasela abantwana abangahlatshwanga ijekiseni yokuvikela umkhuhlane lo abalenyanga eziyisithupha kusiya kuminyaka elitshumi lanhlani (15).

Uthe njalo umkhuhlane lo umemetheke ngamandla ngenxa yembuthano yamabandla ensonto.

Inengi lababhubhileyo abangamatshumi amane lengxenye (45) beseManicaland eyiyo ekhokhelayo ngamanani abantu abagulayo bengaphezu kwamakhulu amathathu lengxenye (356).

Uthe njalo uhulumende useqala uhlelo lokuhlaba abantwana abakuzinga elihlaselwa ngumkhuhlane ukuze ehlise amanani abantwana abazabulawa ngumkhuhlane

Facebook Forum

XS
SM
MD
LG