WASHINGTON DC - Abogatsha lweZimra besebenza lamapholisa emngceleni weBeitbridge ngoLwesihlanu bathethe izimota ezidulayo zelunga leZanu PF, uMnu Justice Mayor Wadyajena, yena osanda kubotshelwa icala lokutshontsha imali yenkampani yeCottco engena kuzigidi ezinhlanu zamadola eMelika, i-US$5 Million.
Izimota lezi ngeyohlobo lweLamborghini kanye leBMW.
Iphephandaba leThe Herald libike ukuba kunakanelwa ukuthi uWadyajena ubezama ukubalekisa lezizimota elizweni ezisa kweleSouth Africa.
Umsakazo weStudio 7 wehlulekile ukukhuluma lamapholisa ngaloludaba. UMnu Wadyajena yena ubengadobhi ucingo lwakhe.
UWadjajena ubotshwe ngamapholisa eZimbabwe Anti-Corruption Commisison ngoLwesibili ndawonye labanye abane ababalisa iziphathamandla zeCottco, uPius Manamike, Maxmore Njanji, Fortune Molai, lomqondisi wePierpont Moncroix uChiedza Danha.
Abatshutshisi bathi abasolwa laba batshontsha imali yeCottco bayathenga izimota ezinkulu zohlono lwamagonyethi.
Lanxa abatshutshisi bebesala ukuthi bakhululwe, umantshi uStanford Mbanje ubakhulule ngoLwesine esithi akulasizatho esingenza baqhubeke bevalelwe.
