amalinks wokungena

Breaking News

Ibandla leZanu PF Lithi Lisahlolisisa Imbhadalo Ephezulu Kakhulu Yokuncintisa Ukhetho Eyethulwe yiZEC


FILE: Amalunga ebandla leZanu PF asemhlanganweni esigabei seEpworth duzane leHarare. (Columbus Mavhunga/VOA)

Ibandla leZanu PF lithi lisahlolisisa okwethulwe yikhomishini ebona ngezokhetho eyeZimbabwe Electoral Commission (ZEC) ekhuphule imbhadalo yokuncintisa kukhetho lukamongameli yafika kunkulungwane ezingamatshumi amabili zamadola eMelika – US$20,000 umuntu munye ngamunye.

IZEC ikhuphule njalo imbhadalo yokuncintisa kukhetho lokudinga amalunga edale lephalamende lokunye okutshiyeneyo.

UMnu. Tafadzwa Mugwadi, obona ngokwethulwa kwemibiko kubandla leZanu PF, uthi basahlolisisa udaba lolu.

UMugwadi uthi, “Asikahlaliphansi njengebandla sahlolisisa udaba lolu lokuthi bakwenze njani. Asikahlolisisa ukuthi kulesisindo kumbe hatshi. Singeke satsho ukuthi sivumelana lakho kumbe hatshi. Sizahlala phansi sikhulume ngakho. Mina ngilapha njengomuntu okhangelane lokwethulwa kwemibiko. Inkokheli yebandla yiyo ezakutsho ukuba sithini ngalokhu. Kuzakwenziwa konke lokhu sesikhulume lozulu.”

Uphinde wathi, “Sesibone amanye amazwe ekwenza lokhu kodwa asikwazi ukuba bakwenza ngaliphi. Sengizwe amalunga amabandla aphikisayo lakunhlanganiso ezizimeleyo besithi kubi kakhulu okwethulwe yiZEC. Thina asikafiki lapho. Siyakuhlonipha okwenziwe yiZEC ngoba yikhomishini ezimeleyo. Asifuni ukukhuluma lokhu okwethulwe ngabanye abantu. Asifuni ukuthi singenele kulokhu okwenziwa yiZEC. Nxa kuzakuba lokuxoxisana, sizakhulumisana ngakho. Nxa kuyikuthi benze into ebukekayo, akulanto esingayenza ngakho.”

UMnu. Kucaca Phulu, igqwetha elilwela ilungelo loluntu njalo olilunga lebandla leCitizens Coalition for change, uthi akumelanga abakhonona ngokwethulwe yiZEC bagijimele emthethwandaba udaba lolu lungakahlolisiswa ngumthethwandaba.

Facebook Forum

XS
SM
MD
LG