amalinks wokungena

Breaking News

Abezempilakahle Sebehlolisisa Okwenziwe NguNkosikazi Ramathupa Owethulele Isigulane Esidabuka eZimbabwe Amazwi Anzima


Phophi Ramathupha (Video Screen Shot)

Ugatsha lukahulumende olubona ngezempilakahle kwele South Africa luthi soluhlolisisa okwethulwe nguNkosikazi Phophi Ramathupa, ophume ku-video ekhuluma kabuhlungu eBela Bela Hospital esabelweni seLimpopo lesigulane esidabuka eZimbabwe.

Umbiko owethulwe ngoLwesine luhlangothi lukahulumende lolu olweDepartment of Health, uthi kuzahlolisisi i-video kaNkosikazi Phophi Ramathupha impumela yakhona inikwe ophethe ugatsha lwezempilakahle okwamanje okukhefu.

Uhlangothi lolu luphine lwathi kuliqiniso ukuba ezempilakahle azisaqhutshwa ngemfanelo endaweni ezinengi zelizwe ngenxa yabantu bokuza abafika nsukuzonke kwele South Africa.

Lukhumbuze abezempilakahle ukuba behloniphe izifungo seHippocratic Oath lemithetho yezempilakahle yelizwe elawula ukuphathwa kwezigulane labantu bokuza.

Umsekeli kamphathintambo wogatsha lwezempilakahle, uMnu. Sibongiseni Dhlomo, utshele abezindaba ukuthi iLimpopo ngesinye sezabelo ezilaloluhlupho okwedlulisa amalawulo.

UDhlomo uthi inkulumo yokuthi abokuza banengi ezibhedlela zakwele South Africa liqiniso elilobufakazi.

Uthi kufanele lokhu kukhulunywe ngamazwe ezansi yezwekazi leAfrica ukuze kulungiswe.

Loba kunjalo uthi abavumelani loNkosikazi Ramathuba ukuthi inkulumo enje ikhulunywe kusigulane.

Kuvideo kamabon kude uNkosikazi Ramathuba uzwakala ebuza isigulane sesifazana esidabuka eZimbabwe ukuthi kungani ezodinga ukwelatshwa kwele South Africa ngoba bekufanele akuthole kumongameli Emmerson Mnangagwa.

Inengi lezizalwane zeZimbabwe labo bathi liqiniso elingavikekiyo leli elethulwe nguNkosikazi Ramathuba, oyisiphathamandla sezempilakahle eLimpopo.

UMnu. Tino Mambeu, owenhlanganiso yeZimbabwe Exiles Forum, uthi kufanele uhulumende weZimbabwe ahlawulele ukwelatshwa kwabantu bakhe eSouth Africa njengoba sezifahlakele ezempikahle eZimbabwe.

Uthi ngeke iSouth Africa iqhubeke ithwalela iZimbabwe inhlupho zayo. Uthi kufanele kusolwe uhulumende kaMnangagwa hatshi ukusola izigulane.

Esinye isizalwane seZimbabwe, uMnu. Mlungisi Sibanda, laye uthi limqotho elika Ramathuba.

“Ngicabanga ukuthi uMEC ubekhuluma iqiniso. Iqiniso elibuhlungu, kodwa ukhethe isikhathi lendawo engayisiyo yokubana alibeke iqiniso lelo.

Langamazwi agcizelelwa ngesinye isizalwane seZimbabwe, uNkosazana Linda Ndou.

“Liqiniso, iqiniso elibuhlungu ikakhulu to amaZimbabwean ngoba eqinisweni igovernment yaseSouth Africa ayibhajethelanga amaZimbabwean citizens in as much as igovernment yaseZimbabwe ingabhajethelanga amaSouth African citizens. Lelo liqiniso.”

Umgcinisihlalo weZimbabwe Community in South Africa, uMnu. Ngqabutho Mabhena, uthi njengoba uMnangagwa loMongameli Cyril Ramaphosa bebehlangene emhlanganweni weSouthern African Development Community ensukwini ezisanda kwedlula, le yiyo inkulumo obekufuze bayiphathe.

“Bekungafanelanga akhulume inkulumo leyo kusigulane. Inkulumo leyo yiyo okumele uhulumeni weSouth Africa lebandla elibusayo okumele bayikhulume bekhangelene kanye legovernment yeZimbabwe.:

Loba kunjalo amabandla aphikisayo kweleSouth Africa eleEconomic Freedom Fighters leDemocratic Alliance bathi uNkosikazi Ramathuba kufanele asuswe esikhundleni sakhe ngenxa yenkulumo yakhele.

Kusenjalo, umsakazo kamabonakude kwele South Africa oweENCA uthi uMnangagwa usephawulile ngenkulumo kaRamathuba.

Ngokutsho kwalo umsakazo uMnangagwa uthi eleSouth Africa liyayekethisa kakhulu imithetho yikho izizalwane zeZimbabwe zizaqhubeka zisephula imithetho yalo.

Uthi abangena elizweni ngokungekho emthethweni yizigangi ngakho kuzafanele bebotshwe.

Facebook Forum

XS
SM
MD
LG