Abantu abanengi bathi kumele abezombusazwe bekhulumisane ngezodlakela olumemetheka kwezinye indawo eZimbabwe lapho okuthiwa lutshotshozelwa libandla leZanu PF.
Kulamalunga ebandla eliphikisayo eleCitizens Coalition for Change asanda kutshaywa ngabacatshangelwa ukuba ngabalandeli bebandla elibusayo.
Kulamalunga ebandla leCCC eGokwe, Wedza lezinye indawo abathi asanda kutshaywa ngabacatshangelwa ukuba ngabebandla leZanu PF.
UMnu. Ostallos Siziba, umsekeli wesikhulumeli sebandla leCCC, uthi bakhathazekile ngodlakela olwenzakala eZimbabwe.
UMnu. Tafadzwa Mugwadi, ophethe uhlangothi olubona ngokwethulwa kwemibiko kubandla leZanu PF, uthi udlakela luphehlwa ngamabandla aphikisayo.
Abanye abakubandla leZanu PF abagoqela uMnu. Joseph Tshuma bathi udlakela aloqondanga.
UTshuma uthi abantu kumele bevimbe udlakela eZimbabwe.
Lokhu kusekelwa nguMfundisi Useni Sibanda, okunhlanganiso yeZimbabwe Christian Council, othi kumele abantu behlale phansi behlafuna udaba lodlakela
USibanda kunengi okungenziwa eZimbabwe ukwenzela ukuvimba udlakela.
UMnu. Effie Dlela Ncube, olwela ilungelo likazulu, uthi sokumele kungenele amanye amazwe ukuze kuvinjwe udlakela eZimbabwe.
Kukhangelelwe ukuba luzamemetheka kakhulu udlakela ngesikhathi kulungiselelwa ukhetho oluzakwenziwa ngomnyaka ozayo.