amalinks wokungena

Breaking News

UJim Kunaka Labanye Abazwela uJob Sikhala Lamalunga eCCC Avalelwe Entilongweni Bathi Uzulu Sokumele Abakhulule Hatshi Imithethwandaba


UMnu. Job Sikhala uhlala efakwe amaketani entilongweni lesikhathi esiya emthethwandaba ...

UMnu. Jim Kunaka, okunhlanganiso yeFriends of Job Sikhala Solidarity Trust, uthi sokumele abantu eZimbabwe bekhulule amalunga ebandla leCitizens Coalition for Change (CCC) abavalelwe entilongweni besetheswa amacala okutshotshozela udlakela.

UKunaka utshele intathelizindaba eHarare ukuba amalunga edale lephalamende - UMnu. Job Sikhala loMnu. Godfrey Sithole - labanye abakubandla leCCC asebehlale eChikurubi Maximum Prison okwenyanga phose of ezintathu, kabasoze bekhululwe ngoba imithethwandaba ibanjwe xhaka nguhulumende kaMongameli Emmerson Mnangagwa.

UKunaka uthi ibandla leCCC selilahlise abanye babo abavalelwe entilongweni loba lilamandla amangalisayo okusebenza lozulu ukuze kukhululwe uSikhala labanye bakhe okuthiwa batshotshozela udlakela eNyatsime, okwabulawa khona uNkosikazi Moreblessing ngocatshangelwa ukuba wayethunywe libandla elibusayo.

UKunaka wethule amazwi la phambi kwabanye bakhe abagoqela uMnu. Marvelous Khumalo, owake wabangummeli wesigaba seSt. Mary’s, uMnu. Jacob Ngarivhume, umkhokheli webandla leTransform Zimbabwe, uMnu. Godfrey Tsengengamu, okhokhela ibandla leFEEZ, loMnu. Sybeth Musengezi, ilunga le ZANU PF elaxotshwa kunyanga ezisanda kwedlula kulandela ukumangalela uMongameli Emmerson Mnangagwa emthethwandaba.

UKhumalo utshele intathelizindaba ukuba kuyadanisa indlela udaba luka Sikhala oluphethwe ngayo.

“Sifuna ukuba akhululwe uSikhala ngoba akula okutshengisa ukuba waphazamisa. Siyazi ukuba kulabantu abanengi abalamacala kodwa kabaphathathwa njengo Sikhala. Ukuncitshwa kwakhe ibail kutshengisa ukuba kungabe kulendlela yokungenela kwabezombusazwe. Sibona engani kukhona abavimba ukukhululwa kwakhe”

Lokhu kugcizelelwe nguMnu. Godfrey Tsenengamu, owake waba yisiphathamandla sebandla leZanu PF.

“Ibandla leCCC kumele lizame ukwenza indlela zokubanga umsindo ukuze uSikhala akhululwe. Yibo abalebandla elilabantu”

Kodwa uMnu, Devine Ncube, umsekeli weZANU PF, uthi kumele kulandelwe umthetho hatshi imibono yabangane baka Sikhala.

Facebook Forum

XS
SM
MD
LG