amalinks wokungena

Breaking News

Akudingwe Indlela Zokuphatha Kahle Abokuza Loba Bengelamaphepha, Kutsho ele Botswana


Umthethwandaba wele Botswana

Umsekeli kasibalukhulu kugatsha olubona ngokuqhatshwa kwabantu kweleBotswana, unkosikazi Boinelo Lebelo, ekhuluma kulo umhlangano uthi okuqala umuntu kumele abe lamaphepha aqondileyo awokuhlala lokusebenza elizweni.

EleBotswana selikhuthazwe ukuhlonipha amalungelo abangena elizweni okungekho emthethweni, noma bengalalo ilungelo lokuba kulelozwe. Lokhu kuza ngesikhathi kulokuqonga kwezehlakalo zenzondano kwabokuza kweleSouth Africa ikakhulu zibhekiswe kwabadabuka eZimbabwe.

Ngesikhathi kubanjwe umhlangano oqoqwe yinhlanganiso yeSouthern Africa Migration Management Project edolobheni leJwaneng ngoMvulo, inengi livumelene ukuthi kumele kudingwe indlela yokuphatha kahle abokuza.

Umsekeli kasibalukhulu kugatsha olubona ngokuqhatshwa kwabantu kweleBotswana, unkosikazi Boinelo Lebelo, ekhuluma kulo umhlangano uthi okuqala umuntu kumele abe lamaphepha aqondileyo awokuhlala lokusebenza elizweni.

ULebelo ukuthi okwesibili kumele kudingwe ukuthi labo abangalamaphepha bangaphathiswa kanjani ukuze bengazithole bephambene lomthetho.

“Noma kanjani, sihlangana labokuza emsebenzini etshiyeneyo. Kodwa okumele sikubuze yikuthi balemvumo yokuba selizweni? Balamalungelo bani njengabokuza, njalo singenza njani ukuthi babe lalungelo njengabobonke abokuza abaselizweni.”

Umhlangano lo uvumelene ukuthi kumele kube lemizamo kanye lemithetho ekhona ebona ukuthi abokuza bavikelekile ikakhulu uma lapho abasebenza khona noma bengelamaphepha.

Unkosikazi Gloria Moreo-Fontes owenhlanganiso yeSouthern Africa Migration Project, uthi kumele amazwe atshiyeneyo ahloniphe ilungelo loluntu.

“Imthetho eyavunyelwana ngamazwe omhlaba ithi ilungelo loluntu kumele lihlonitshwe, njalo kumele sonke sisebenze endaweni engelabandlululo.”

Ngemva komhlangano lo, kukhangelelwe ukuthi kube lokusebenzisana ngcono phakathi, ikakhulu kwabaqatshi labokuza abangena elizweni okungekho emthethweni.

Eminyakeni esanda kudlula izondano kwabokuza emazweni atshiyeneyo iya ikhula ikakhulu kweleSouth Africa, lapho izizalwane zakhona zisithi abokuza baphindele emuva.

Abanye abafana lonkosazana Sindiso Sibanda bathi noma nje kweleBotswana kungelanzondano emngceke njenge South Africa, kulukhuni ukuhlala kwelinye ilizwe ikakhulu ungelamaphepha.

“Umuntu uyasuka ekuseni esiya emsebenzini kodwa acine ebanjwe ngamapholisa wabuyiselwa ekhaya. Kucina kusiba lokulahleka kwemali.”

USibanda uthi okunye yikuthi abokuza bangaze bezame ukuthola amaphepha aqondileyo awokusebenza bayatshelwa ukuthi kulabeBotswana abangenza lowo msebenzi.

“Ungathi uzama ukuyenza amaphepha ukuthi ubelelungo lokuhlala, abavumi. Bayakutshela ukuthi ama citizens ayenelisa ukwenza umsebenzi lo. Kunzima ukuhlala ungumuntu wokuza.”

Kusenjalo inhlanganiso ye Zimbabwe Human Rights Commission ibambe umhlangano kuyonale iviki eHarare lapho okutshengiswe ukukhathazeka ngesiphatho sabokuza. Umbuthano lo ube ungenelwe ngomgcinisihlalo sezinye inhlanganiso ezifana le ZHRC emazweni asemhlubulweni wangezansi kwezwekazi leAfrica.

Ekupheleni kwalo mhlangano kulotshwe isivumelwano esibizwa ngokuthi yi Harare Declaration on Violence against Migrants in the SADC region.

Ngaphansi kwesivumelwano lesi, kunqunywe ukuthi amazwe wonke angaphansi kwenhlanganiso ye SADC, abone ukuthi abokuza bayavikeleka, njalo kuhlonitshwe ilungelo loluntu.

please wait

No media source currently available

0:00 0:03:27 0:00

Facebook Forum

XS
SM
MD
LG