amalinks wokungena

Breaking News

Ubudlelwano Buka Masisi loMnangagwa Bethusa Abanye Abantu eZimbabwe


UMongameli Masisi loMongameli Mnangagwa basembukiso weHarare Agricultural Show. (VOA)

Ubudlwelano buka Mongameli Mokgweetsi Masisi wakwele Botswana lomunye wakhe weZimbabwe, uMongameli Emmerson Mnangagwa, buyabuqhela kodwa abanye bayabusola besithi benza ukuthi eleBotswana liyehluleke ukukhuza eleZimbabwe lapho eliphambuka khona.

UMnangagwa waba ngumkhokheli wakuqala ukunxuswa kwele Botswana ukuthi ayekhulumisana lamalunga edale lephalamende lakulelolizwe ngomnyaka ka2018. Lesi kwakuyisikhathi esanda ukuhluthuna intambo zombuso kumuyi uRobert Mugabe ngomnyaka ka2017.

UMnu. Ian Khama Seretse Khama nguye owayengumongameli weBotswana owanxusa uMnangagwa.

Kodwa uKhama waqala ukumchothoza uMnangangwa esithi kasahlalanga emzileni wokuhlenga uzulu weZimbabwe kundubo abhekane lazo.

UMnangagwa wasungula ubudlelwano lomunye wakhe uMasisi, ababili laba besethekelelana kanengi nengi.

Kuyonale iviki, uMnangagwa unxuse uMasisi ukuthi ethekelele kwele Zimbabwe okwensuku ezinthathu njalo avule umbukiso weHarae Agricultural Show.

Abacubungula ezombusazwe abafana loMnu. Zenzo Moyo bathi ubudlelwano lobu buyamangalisa njalo kabusoke bulethele amazwe womabili inzuzo.

UMoyo uthi, “Angeke mina ngithi yibudlelwano beZimbabwe leBotswana ngoba asikabona inzuzo. Okwakhathesi yibudlelwano phakathi kwababili njengabantu abakhokhela lawa mazwe.”

UMoyo uthi kuzabanzima ukuthi uMasisi achothoze uMnangagwa kumbe inkokheli yeZimbabwe uma bengabusi kuhle.

“Angiboni ukuthi umongameli Masisi ngobungane bakhe loMnangagwa kuzamenza abekwazi ukuthi atshele uMnangangwa ngendlela abusa ngayo eyenza abantu beZimbabwe bengaboni ukuphumelela bezebecina bebalekela kwamanye amazwe.”

Omunye ocubungula ngezombusazwe, uMnu. Effie Dlela Ncube, uthi ubudlelwano phakathi kukaMasisi loMnangagwa kumele bungakhangeli ezomnotho kuphela kodwa kuqakathekiswe ilungelo loluntu.

“Kuqakathekile ukuthi kukhangelwe ukuthi inkokheli iphethe njani abantu. Okuqakathekileyo ngabantu. Uma umakhelwane engaphathanga kahle abantu kumele limtshengise lokhu. Lingamphakamisa uma ehlukuluza abantu, liyabe limkhuthaza ukuthi aqhubeke esenza akwenzayo.”

UMnu. Ntokozo Thebe ngomunye wabanengi abasuka eZimbabwe ukuyadinga impilo engcono kweleBotswana. Utsho imbono yakhe phezu kobudlelwano bukaMasisi loMnangagwa.

“Ngiyabusola ubudlelwano lobu. Mhlawumbe uMnangagwa uzatshela uMasisi ukuthi ayenze lokhu okwenzakala eSouth Africa, sicine sibuyiselwa ekhaya.”

Ubudlelwano bukaMasisi loMnangagwa kuyikuguquka kwesimo ngemva kokuba ababengomongameli uKhama weBotswana loMugabe eZimbabwe, babengumangoye lenja.

UKhama wayengadondi ukutshela uMugabe ukuthi usetshaphaze umnotho welizwe, osekudale ukuhlupheka kuzizalwane zeZimbabwe.

Facebook Forum

XS
SM
MD
LG