amalinks wokungena

Breaking News

EleSouth Africa Lengeza Ngenyanga Eziyisithupha Isikhathi Sokuthi Abalama Special Permits Bethole Amaphepha Amatsha


FILE - Abadabuka eZimbabwe balungisa amaphepha okuhlala lokusebenza kwele South Africa.

EleSouth Africa selengeze isikhathi sabalamaphepha aweZimbabweans Special Permit ngenyanga ezinhlanu.

Uhlangothi lukahulumende olubona ngendaba zekhaya lwethule umbiko lo namuhla lusithi luthethe isinqumo lesi ngenxa yokuthi balutshwana abantu abalamaphepha aweSpecial Permit asebezama ukuthola amaphepha amatsha.

Luthi lutshelwe ngamalunga ekhomithi eyeDepartmental Advisory Committee ngoLwesine ukuba kusakude phambili ukuze abadinga amaphepha amatsha belungise okufunakalayo.

Ngakho-ke uhlangothi lolu luthi solwengeze ngenyanga ezinhlanu kusukela ngoMpandula lonyaka kusiya ngoNhlangula ngomnyaka ozayo ukwenzela ukuthi abalamaphepha la bethole amatsha.

UMnu. Aaron Motsoaledi, ophethe uhlangothi lwendaba zekhaya, uthi akulamuntu ozaxotshwa kwele South Africa olamaphepha eSpecial Permit ngenxa yokuthi uyabengela maphepha amatsha.

Uthe kumele abokuza laba bengakhahlanyezwa ngoba kukhangelelwe ukuba bayabe belungisa amaphepha abo.

UMnu. Ngqabutho Mabhena, umgcinisihlalo wenhlanganiso yeZimbabwe Community in South Africa, uthi bathakazelela isinqumo lesi esethulwe nguhulumende wakwele South Africa.

UMabhena uthi kukhangelelwe ukuba bazakhulumisana lohlangothi lolu ngokunengi ngalesos'ikhathi, ikakhulu ngokuhambelana lalabo okumele behambisa isicelo sokuthi behlale kulelolizwe besebenzisa okuthiwa ngama waivers ngeSilungu.

Facebook Forum

XS
SM
MD
LG