JOHANNESBURG - Izizalwane zeZimbabwe ezihlala kweleSouth Africa ziphansi kohlelo lweZimbabwe Exemption Permits sezamukele inyathelo likahulumende walelolizwe elokwengeza isikhathi sokuthi zifake izicelo zokungena kweminye imikhakha yama-permits.
Kodwa zithi akulanto ejabulisayo lapha ngoba lokho obekusenza zehluleke ukuthola lawo ma-permits kulokhu kungakasuswa.
Umphathintambo wendaba zasekhaya uMnu Aaron Motsoaledi uthe ama-permits ezizalwane zeZimbabwe abekhangelelwe ukuphelelwa yisikhathi ngoMpalakazi asezasebenza kuze kuyefika uNhlangula womnyaka ozayo.
Uthe iqula abelikhethile elizakhangela izicelo ezifakwe ngabeZimbabwe laba yilo elicele ukuthi kwengezwe isikhathi ukuze lanelise ukuqeda umsebenzi eliwuphiweyo.
Isizalwane seZimbabwe uNkosazana Victress Mathuthu uthi lanxa belamukela lelinyathelo, balovalo lokuthi uNhlangula uzafika belokhu besehluleka ukufaka izicelo zamanye amapermits.
Esinye njalo isizalwane seZimbabwe uMnu Mlungisi Tshabalala uthi izizalwane zeZimbabwe kufanele zisebenzise isikhathi lesi ukuqoqa imitshaqana yazo.
“Umuntu abone ukuthi yonale i6 months ayiphiweyo zonke izinto zakhe uyazibisela ekhaya loba ukuyaqala ekhaya, kutsho uTshabalala exoxa leStudio 7 eseJohannesburg.
