amalinks wokungena

Breaking News

UGift Lunga Junior Uqeqetsha Abatsha Abakuqembu leBulawayo City


Former Highlanders and Warriors player, Gift Lunga Junior

Owayeyimvimbi elodumo uGift Lunga Junior uthi abasakhulayo kabaselalo uthando lomdlalo wenguqu kulezinsuku.

ULunga, owaziwa kakhulu ngegama elithi Thebe, usebenzela iqembu leBulawayo City lapho angomunye wabaqeqetshi abasebenza lamaqembu abafana abasakhulayo.

Uthi kulomehluko omkhulu kakhulu nxa kufaniswa abadlali abasakhulayo abakulezinsuku lalabo abakudala.

“Kulobunzima ngoba abafana laba sebelahleka bengavele bafikise iminyaka elitshumi lane. Uyabona ungavele ukhuthe ukuzilolonga usuleminyaka elitshumi lane kusiyaphezulu uyabe usulahlekile. Thina sibekhona kusukela sileminyaka elitshumi lantathu njalo sayala silokhu sikhona ebholeni, manje abafana bakulezinsuku sebefuna ukufuqwa ukuze babekhona ebholeni.”

ULunga uthi labo abayala belokhu bekhona ebholeni uyabalolonga aphinde abafundise ukuba babe ngabadlali abaziphethe kuhle.

“Ngiyabe ngibanika into engayenzayo njalo ngibaphathisa lapha lalaphaya. Okwabo lithalenta njalo labo abalethalenta siyazama ukubakhuthaza ukuba baziphathe kuhle ngoba akumelanga bayenze amaphutha thina esawenzayo. Kunengi okubi esasikwenza njalo kumele sibaphathise ukuba bephume kuzonalezo zinto ukuze baphumelele.”

ULunga, osebenza loBruce Tshuma kanye loVoster Chitema, uthi kuqakathekile ukubambisana ekuqeqetsheni umdlalo wenguqu.

“Ebhoreni awungeke usebenze uwedwa. Thina siyancedisana njalo olombono wakhe siyawemukela.”

UChitema laye ugcizelele ukuba kulula ukusebenza labaqeqetshi abalidlalayo ibhola.

“Kuyisibusiso ukusebenza labantu abadlala ibhola uThebe loBruce ngoba izinto ezinengi kasiphikisani siyabe sivumelana ngoba sadlula kukho.”

Esakhula uLunga udlalele amaqembu abalisa eleZimbabwe Saints kanye lelePhinda Mzala. Uqale ukudlala kuqembu leHighlanders ngo1997, eqeqetshwa nguMadinda Ndlovu.

Uke wadlala njalo kumaqembu amela ilizwe njalo ngomnyaka ka2004 ubeyingxenye yeqembu lamaWarriors eliphakamise inkezo yeCosafa.

ULunga uke wadlalela njalo iqembu leCaps United njalo ekuthatheni kwakhe umhlalaphansi uke waqeqetsha abasakhulayo abeqembu leHighlanders, uke waqeqetsha njalo leqembu elidlala kusigaba seSouthern Region Division One eleMosi Rovers.

Facebook Forum

XS
SM
MD
LG